Abebandla le People's Democratic Party (PDP), bathi kumele kubunjwe umanyano wamabandla aphikisayo alombono ofanayo abathi yiyo yodwa indlela kuphela engaphathisa ukususa umongameli Robert Mugabe lebandla alikhokhelayo ele Zanu Pf kukhetho luka 2018.
Emhlanganweni lentathelizindaba owenzelwe emahofisini aleli bandla emzini we Eastlea e Harare, umkhokheli wePDP uMnu.a Tendayi Biti uthi akukho enye indlela ngaphandle kokuba abamabandla babambane.
Abe PDP laba bathi kodwa kabayi kumanyana labamabandla ahlose ukufeza izifiso zawo hatshi ezikazulu.
Unobhala jikelele ebandleni leli, uDr Gorden Moyo ukugcizelele lokho ethi ngoba kuyiyona ndlela kuphela engaletha inguquko uqobo elizweni nxa kuthe kwasetshenzwa ngombono munye.
UMoyo uthi sikhuluma nje kuyaphithizelwa ngasese ngemizamo yokubonisana ngenqondo yokuba kube lesibaya esisodwa ngenjongo yokuletha umbuso wabanengi.
UMoyo uthi abebandla lakhe bayemukela indlela indlela ethiwa isizasetshenziswa eyokuvhota ngesithupha eye Bio – metric. Kodwa uthi abekwesabayo yikuba abebandla leZanu Pf bengadinga amaqhinga wokuzama ukuphazamisa ukusetshenziswa kwalindlela.
Abebandla lePDP bathi sebeqale ukuloba umthetho ophathelane lezokhetho, iElectoral Bill ngenhloso yokuguqula lo okhona abahlezi bekhala ngawo.
Bathi njalo bazakusa kizo zonke ingatsha zikahulumende eziphathelane lokhetho okubalisa edale lephalamende, abenhlanganiso ebona ngezokuqhutshwa kokhetho ye Zimbabwe Electoral Commission – ZEC kanye labo abebandla elibusayo ele Zanu Pf ngenjongo yokuba kuvunyelanwe ukuze kusiyafika ukhetho lomnyaka ka 2018 ube ube usungumthetho ongasetshenziswa.
Abe PDP laba bathi yikhona bezangena kuzulu ukumfundisa phezu kwendlela yokuvota kusetshenziswa isithupha ( Finger prints ) ukuze bangatshelwa amanga ngabebandla elibusayo leZanu Pf lisebenzisa indlela yalo zokuqilibezela abantu.
Abe PDP laba bathi bazimisele ukuthuthukisa umnotho welizwe kungakho sebekhethe ukusebenzelana lenye yengcwethi kuloluhlangothi uMnu. Vincent Museve, osezakhokhela loluhlangothi.
