Kulezizalwane zeZimbabwe ezinengi okwamagama ezihlala emazweni atshiyeneyo ezithwele nzima ngokuswela imisebenzi.
Abanye abamele izizalwane lezi abahlala eBhilithane, eMelika leAustralia abakhulume leStudio 7 bathi inengi lalabo abangela misebenzi sebephila ngokucela uncedo kuhulumende.
Bathi okuhluphayo emazweni anjenge Bhilithane yikuthi kulezizalwane zamanye amazwe esezithethe imisebenzi enjengokukhangela abagulayo, ukwakha lokunye okutshiyeneyo.
UNkosikazi Lucia Dube, umgcinisihlalo wenhlanganiso emele izizalwane zeZimbabwe ezihlala kwamanye amazwe eye Zimbabwe Disapora Focus Group, uthe impilo inzima kulabo abaphila ngomusa kahulumende.
UNkosikazi Dube uthi kumele labo abalemisebenzi baqalise ukusebenza ndawonye ukwenzela ukuthi baqoqe imali yokwenza amabhizimisi kumbe ukuvuselela amankampani abhidlikayo anjengeZimbabwe Electricity Supply Authority, National Railways of Zimbabwe lamanye angaphansi kukahulumende.
Uthi izizalwane zamanye amazwe ziyakwenza lokhu okokwenze ukuthi ziphumelele.
Uphinde wathi kuyabe kungalunganga ukuthi umuntu ahlale emazweni abesebuyela ekhaya esiyadinga umsebenzi.
