Udaba lwezabelo esezilesikhathi zingela bammeli edale lephalamende kanye laku-senate soluphenduke lwaba yinsakavukela njalo emphakathini ngemva kwembiko kamabhalane wephalamende yokuthi kulezabelo phose ezingamatshumi amathathi ezingelabammeli.
Umabhalane wedale uMnu Austine Zvoma uthi kulezabelo ezingamatshumi amabili lathoba minwemibili, 28, ezingela bammeli ngezizatho ezitshiyeneyo ezigoqela ukufa kwababevele bezimela.
Abanye ngasebaxotshwayo kumabandla abo, kuthi abanye ngasebanikwa izikhundla eziphezulu basebetshiya ke ukuba ngabammeli balezindawo ephalamande.
Abaxotshwayo kumabandla abo bagoqela uMnu Abednico Bhebhe, uMnu Norman Mpofu loMnu Njabuliso Mguni.
Abathathu laba baxotshwa kuMDC ekhokhelwa nguMnu Welshman Ncube basebesiya kwekhokhelwa nguMnu Morgan Tsvangirai. Ngalokho izihlalo zabo zasala zingelabammeli.
Kodwa umthethwandaba unqume ngomnyaka ophelileyo ukuthi kumele uMongameli Mugabe ahlele ukhetho lwama by-elections ezabelweni zabathathu laba lwenziwe. Kodwa uMugabe waphikisa lesi sinqumo eSupreme Court.
Abanye kuZanu PF, abagoqela uMnu Jonathan Moyo bathi yikwephula umthetho ukuthi indawo lezi zihlale isikhathi sonke lesi zingela bammeli.
Izabelo ezazimelwa nguBhebhe, uMguni loMpofu sezileminyaka edlula emibili zingela bammeli kudale lephalamende. uMnu Bhebhe uthi ukhetho kumele lwenziwe ngokuphangisa.
Kodwa umqoqi wenhlelo zeMDC ekhokhelwa nguMnu Welshman Ncube, uMnu Qhubani Moyo uthi ama by-elections kumele enziwe ngasikhathi sinye lokhetho oluzayo ukuze kwehliswe indleko zokhetho.
