Ababalisi bemaphandleni abakumanyano we Amalgamated Rural Teachers Union of Zimbabwe-ARTUZ bathi baqalisile ngoMvulo ukuqeqetsha abanye abafundi, ikakhulu labo abazabhala imihloliso yabo lonyaka besebenzisa ubulembu be internet, ukwenzela ukuthi bengasaleli emuva kuzifundo zabo, ngesikhathi izikolo zivaliwe ngenxa yomkhuhlane weCOVID 19.
Isikhulumeli sogatsha olubona ngezemfundo uMnu. Taungana Ndoro utshele iStudio 7 ukuthi bayalamukela lelinyathelo njalo labo njengohulumende baphakathi kokuphathisa abafundi ngemitshina yokusebenzisa ezifundweni zabo.
Isiphathamandla seARTUZ uMnu. Mduduzi Jubane, obefundisa abakusifundo sikaGrade 7 loGrade 6 kwezokulima ngoMvulo esebenzisa inhlelo zebulenjini, namuhla, usichasisela okunengi ngaloluhlelo, kanye lengxaki ezibhekane labantwana abahlala emaphandleni.
