Imali entsha eyeZimbabwe Gold (ZiG), eyephepha leyelitshe, iqale ukutholakala emabhanga namuhla, kodwa kawayisiwo wonke amabhanga akade elayo limali. Imali le yamukelwe ngemibono etshiyeneyo abanye besithi bayayithakazelela iZiG, ngoba izanceda ekutholakaleni kwentshintshi nxa abantu bethenga loba begada imitshova.
Kodwa kulabanye njalo abathi kayisoze imise ukugugudeka kwemali yelizwe.
Imali yamaZiG leyi ibingatholakali ngendlela ibhanga leReserve Bank of Zimbabwe ebithembise ngayo, ngoba manengi amabhanga aze avala iminyango abantu bengakayitholi.
UMnu. Mqhele Mutawarira, isakhamuzi seMarlborough eHarare, uthi akakayibambi esandleli imali yamaZiG, kodwa ulethemba lokuthi izasiza uzulu nxa isitholakala.
Omunye owesilisa ongathandanga ukuvezwa igama uthi kayitholanga imali le ebhanga lakhe.
\ Kodwa ayisikho bonke abayisweleyo limali ngoba othengisa impahla edolobheni lakoBulawayo, uMnu. Dingani Mthombeni ngomunye othi kukhanya ubengomunye wabakuqala abathole iZiG yamaphepha.
Ingakasungulwa limali yamaZiG, uzulu ubedubeka ngokuswela intshintshi nxa efuna ukuthenga, kumbe nxa egada imitshova. Njengesibonelo, endaweni lapho obekuhlawulelwa ukugada umtshova ngengxenye yedollar leMelika-50c, uzulu ubesebanjwa ngamandla ukuhlawula ngedola, aphiwe intshintshi kwezinye indawo ngama coupon kumbe ngeyinye impahla loba ukudla okunjenge ziwiji, endaweni yokuphiwa intshintshi.
Okhokhela inhlanganiso emela osomabhizimusi abalezitolo, eyeConfederation of Zimbabwe Retailers, uMnu. Denford Mutashu, uthi ukutholakala kwamaZiG kuzanceda ukuqeda udubo lwentsintshi.
IStudio 7 ibhode emigwaweni, ezitolo lezinye indawo yananzelela ukuthi imali yamaZiG ibiyigcosana, abanengi besithi bebengakayiboni.
Kodwa usibalukhulu webhanga elikhulu lelizwe eleRBZ, uMnu. John Mushayavanhu, utshele iStudio 7 ukuthi njengebhanga, bayathaba ngokwamukelwa kweZiG nguzulu ngelanga lakuqala.
Kodwa ingcwethi ecubungula ezomnotho, njalo esebenza lenhlanganiso eyeNational Consumer Rights Association, uMnu. Effie Ncube, uthi ukuze iZiG isebenze ngendlela ekhangelelwe nguhulumende, kumele uzulu ayethembe kuqala.
Namuhla amabhanga ebenika uzulu imali yelitshe i-1ZiG, 2ZiG le5ZiG, kuthi njalo le10ZiG eyephepha. Kodwa iZiG ihle yehla isisindo sayo namhlanje nxa iqathaniswa leyakwamanye amazwe. Emkambo wensitha, idola linye laseMelika beselithengwa ngamaZiG angamatshumi amabili lambili – 22 ZiG kudola linye leMelika, kodwa emkambo weRBZ, idola laseMelika belitholakala nge14ZiG.
Ubezama sibili ukubopha osiphatheleni uhulumende, kusukela esethula limali entsha yamaZiG inyanga esikuyo iqala, kodwa akwaziwa ukuthi kuzakwenza ukuthi iZiG ingaqhubeki isiwa isisindo nxa iqathaniswa ledola leMelika.
Forum