Iqembu leSenegal elizadibana leleGambia liqala kusasa umkhankaso walo owokuvikela isicoco seAfrica Cup of Nations. Umncintiswano weAFCON uqale izolo lapho iqembu leIvory Coast elinqobe eleGuinea Bissau nge 2 ka-nya emdlalweni wakuqala.
Kweminye imidlalo edlalwe ngeSonto, eleNigeria 1-1 Equatorial Guinea, Egypt 2-2 Mozambique, Ghana 1-2 Cape Verde.
Emdlalweni odlalwa ngoMvulo, banengi abakhangelele ukuba uzakwenza izimanga umdlali olodumo uSade Mane labanye bakhe emdlalweni omelelwe ngabantu abanengi.
Osakhulayo olandela imidlalo le uQuincy Phakathi uthi ukhangelele ukuba iqembu leSenegal lizitholele kalula imiklomelo emithathu emdlalweni walo wakuqala owesibaya sikaGroup C.
“Iqembu leGambia vele alingeke lilimele iqembu leSenegal ngoba iqembu leSenegal lilabadlali abezinga laphezulu inengi abafana laboMane abadlala kumaligi aphakemeyo phetsheya.
Sekungenzeka vele iqembu leSenegal licine liyithethe futhi inkezo njengoba kuvele kuyilo eliyiphetheyo.”
Komunye umdlalo wesibaya sikaGroup C iqembu leCameroon lizadlala leleGuinea njalo uItai “Pablo” Matandi othekazelela umdlalo wenguqu uthi eleCameroon yilo elizanqoba.
“Ngibona angani emdlalweni ozakuba phakathi kweCameroon leGuinea iqembu leCameroon lizanqoba. Angitsho ukuba lizaphakamisa inkezo kodwa ngithi kusasa ngingabheja sibili ngisithi liyanqoba.”
Wona umncintiswano we2023 Africa Cup of Nations uqale izolo lapho iqembu le-Ivory Coast elitshaye eleGuinea Bissau nge 2 ka nya. Owadlalela iqembu lesizwe elama Warriors uRonald “Gidiza” Sibanda uthi abadlali beqembu leIvory Coast bahle balahlela khatshana uvalo ngokunqoba abakwenzileyo lokhu.
“Nxa kuyini eliqoqe imidlalo umdlalo wakuqala uyabe uqakathekile kakhulu ngoba liyabe lidlala phambi kwabasekeli benu njalo lihle libe lesibindi nxa lingathola impumela enhle. Bayitholile impumela enhle ngoba benqobe bathola imiklomelo emithathu okutsho ukuba bazibeke esimeni esihle kakhulu.”
Owadlalela iqembu labesifazane eleMighty Warriors uNokuthula “MaRoe” Ndlovu laye uthi ukunqoba kweqembu leIvory Coast emdlalweni wakuqala kuzakhuthaza labalandeli bomdlalo wenguqu kulelolizwe.
“Ukuthi abaqoqe imidlalo banqobe emdlalweni wakuqala kuqakathekile kakhulu ngoba kuyabapha ithemba elokuba sebengayiphakamisa inkezo. Labalandeli babo labo bayaba lentshukuntshu eyokuthi baye enkundleni bayesekela iqembu labo nsukuzonke ngoba sebelethemba elokuba benganqoba kuyo yonke imidlalo abayidlalayo.”
Umqeqetshi weqembu leSheasham uLizwe Sweswe uthi kusasemasinya ukuba kuhle kuthiwe iqembu leIvory Coast lingaphakamisa inkezo ngoba kulamaqembu angelandumela asengabuchitha bugayiwe.
“Ngibona angani kuzakuba lempumela ezizayethusa abantu lapho amaqembu okuthiwa mancane afana laboNamibia kanye laboTanzania azakuba lempumela ezinhle. Ngithanda khona ukuba ibhola selithuthuke ngendlela eyokuthi labaqeqetshi abamazwe wonalawa esithi mancane sebefunde baze bafika kuzinga lalaba esithi zintshantshu zomdlalo webhola.”
Umlandeli weqembu leHighlanders uNhlanhla “Mtshinda” Moyo laye uthi ukudlala kweqembu leIvory Coast kumenze wakholwa ukuba leliqembu lingaphakamisa inkezo yeAfcon.
“Mina ngibona angani iIvory Coast izaqhubeka idlala kuhle kakhulu ngoba ibingakahlangani kahle loba nje idlale kuhle kakhulu. Ngitsho ngoba ukaputeni wayo uSerge Aurrier ungene evela ebhentshini ikanti loSebastien Haller ubengekho.
Okutsho ukuba nxa isihlangene kuhle isingaphakamisa isicoco ngoba iqembu engibona angani ingabhalansana layo yiSenegal leEgypt.”
Imidlalo le ikhangelelwe ukuba izagqitshwa mhlaka 11 Nhlolanja.
Forum