Owake waba ngumphathintambo kungatsha ezitshiyeneyo kuhulumende njalo wamela iMpopoma edale lephalamende, uDr Sikhanyiso Ndlovu obhubhe emadabukakusa ngoLwesibili usechazwe njengendoda emadodeni eyasebenza gadalala ukuthuthukisa uzulu ikakhulu kwezemfundo.
UDr Ndlovu ubhubhe lamhla ekuseni ngehola lesithathu esibhedlela seMater Dei ngemva kokutshaywa yistroke kanye lomkhuhlane we asthma ngeviki ephelileyo.
Lanxa abemuli yakhe bebesithi odokotela basebenze gadalala ukumelapha, kwehlule.
Owebandla leZanu PF, uMnumzana Absalom Sikhosana uthi uMthwakazi ulahlekelwe kanye lebandla labo lelizwe obala ngoba umuyi ubengumuntu osebenzela uzulu.
Uthi bakhangelele ukuthi balungiselele ukumbeka kunsukwana ezilandelayo ngemva kokukhulumisana lemuli kanye lebandla.
Ingcitshi ekucubunguleni ukuhlalisana kwabantu, uMnumzana Useni Sibanda, uthi umuyi ubeyindoda emadodeni eyasebenza gadalala ukunika abantu bakuleli amathuba okufunda ukuze bazithuthukise.
Inengi labantu elalingatholanga amathuba okufunda ngesikhathi sempi yenkululeko, uthi laphathiseka ngemisebenzi kaNdlovu kulolunhlangothi.
Lanxa uDr Ndlovu walahlekelwa yisikhundla sakhe sokumela iMpopoma ngo2000, inengi labantu lithi yena ngokwakhe uqhubeke esebenzela lindawo, kwahlupha nje ukuthi uzulu wayengasakhwabithi ibandla ayelimela.
Isakhamuzi, uMnumzana Willard Mhlanga uthi umuyi ubengumuntu owehlukileyo kulabanye bakhe kwezombusazwe abaziwa ngokubambisa abantu ilitshe kodwa yena ubezigcwalisa izithembiso zakhe.
Uthi bona bebekhangela abantu beMpopoma bebehawukela ngokuba lommeli osebenzayo ngesikhathi umuyi kunguye ophethe lumsebenzi.
UNkosikazi Emelda Mpofu, oweMpopoma, uthi ubaba uNdlovu uliqhawe ebantwini bakoBulawayo kungakhathalekile ukuthi ubekuliphi ibandla.
Uthi idolobho leli walisebenzela engakhethi mhlobo, okokuthi inengi lentsha eyaphuma eMpopoma esikhokhela lamhla, yaphathiswa nguye ukuthola amathuba okufunda.
Ibandla leZanu PF koBulawayo lithi lizalobela uhlangothi lwePolitburo eliyilo elithatha izinqumo ezimqoka ukuthi umuyi aphiwe inhlonipho yeqhawe lesizwe.
UDr Ndlovu uzelwe mhla zine ngoNkwenkwezi ngomnyaka ka1937. Wasungula ikolitshi lezifundo iZimbabwe Distance Education College – iZDECO.
Kuhulumende, wasebenza kungatsha ezigoqela ezemfundo kanye lezokuhanjiswa kwembiko anduba akhutshwe kuhulumende ngoZibandlela ngo2009 labanye abaphathintambo ababengasela zihlalo ephalamende.
UDr Ndlovu walahlekelwa lizibulo lakhe ngomnyaka ka 2007. Utshiye unkosikazi wakhe, uDr Rose Ndlovu.
Umuyi uMnu. Sikhanyiso Ndlovu wayesazakala kakhulu kwezemfundo wasungula izikolo ezithiwa zdco ilizwe lonke. UNdlovu waba ngumsekeli kamphathimbo wezemfunod ngomnyaka ka 2007.
Wasuka kulesi sikhundla ngomnyaka ka 2008 ngemva kokunqotshwa kukhetho lokumela isigaba se pelandaba mpopoma. Ke sizwe amazwi akhe exoxa leStudio Seven ekuqaleni komnyaka wonalo:
Kusenjalo ibandla leZanu PF lithi khona lizahlala phansi kukhulunyiswane ngodaba lokuthi uzaphiwa na inhlonipho yeqhawe lesizwe kumbe hatshi. Sixoxe lomphathintambo wezokuhlelo ezenotho yelizwe, uMnu. Obert Mpofu ukuze sizwe okunengi ngaloludaba.