UPius Jamba Mukandi, owabulala uNkosikazi Moreblessing Ali wamcoba umzimba wawuphosela emgodini omdala eNyatsime, usegwetshwe ukuba avalelwe entilongweni okweminyaka angamatshumi amathathu – 30 years.
Umahluli wedale leHigh Court uJustice Esther Muremba uthi kazange ethulele uMukandi isigwebo sokuba alengiswe ngoba uthi wenza icala leli edakiwe njalo ethethe izidakamizwa.
UNkosikazi Ali, owayelilunga lebandla leCitizens Coalition for Change, wayemelwe nguMnu. Job Sikhala oselomnyaka lengxenye evalelwe eChikurubi Maximum Security Prison kulandela ukwetheswa kwakhe icala lokutshotshozela udlakela.
USikhala uyaliphika icala leli njalo sokwehlule ukuba aphiwe isibambiso sebail. Okwamanje isidumbu sika Nkosikazi Ali sisesibhedlela seChitungwiza General Hospital.
Ukuhlaziya loludaba, sixhume uMnu. Kucaca Phulu, igqwetha elilwela ilungelo loluntu njalo okubandla leCCC, othi isigwebo lesi senziwe yikukhalakhala kuka Mukandi.
UMnu. Malaki Nkomo owebandla leZanu PF uthi isigwebo lesi siveza ukuba imithethwandaba izimele hatshi ukuba iphansi kukahulumende kumbe ibandla elibusayo.
Forum