Abasakhulayo bathi lanxa bevumelana lamazwi kaMongameli Mugabe awokuthi ukuya kwabo emazweni aphetsheya kubulala umnotho weZimbabwe, akula lutho abangalwenza ngalokhu ngoba emazweni abensundu akula misebenzi.
UMugabe wethule amzwi la emhlanganweni weAfrican Union ngempelaviki lapho akhuthaze khona amazwe eAfrica ukuthi asungule inhlelo ezithuthukisa ontanga ukuze besebenzele emazweni abo bewathuthukisa.
Uthe ukusuka kwabo besiya emazweni aphetsheya afana leMelika leBhilithani kubisela muva intuthuko yezwekazi leAfrica.
Ukusilela kwemisebenzi lokubhidlika komnotho welizwe kwenza izizalwane zeZimbabwe zisuke ngobunengi minyaka yonke zisiyadinga amadlelo aluhlaza kwamanye amazwe.
Ingcwethi kwezentuthuko uMnu Tauya Katso yena oqhuba izifundo zakhe zezinga laphezulu kwezentuthuko, iPHD, uthi ngempela amazwe eAfrica kumele asungule inhlelo ezihuga ontanga.
