Umantshi womthethwandaba weTredgold Magistrate Courts, koBulawayo lamhlanje ugwebe uJosphat Mzaca Ngulube labanye abathathu ukuba bahlale ejele ekweminyaka eyisikhombisa ngemva kokutholakala kwabo bele cala lokuphatheka kudlakela olwenzakale ngoZibandlela lonyaka.
Umtshutshisi uMnu. Jetro Mada utshele idale ukuba uJosphat Mzaca Ngulube, uMelusi Moyo, uOtilia Sibanda loFortune Masuku batshisa imota ezintathu, badiliza umduli womuzi kaNkosikazi Eva Bitu owayengu mgcinisihlalo wohlangothi lwabesifazana kuZANU-PF koBulawayo babulala lamafasitela omuzi wakhe NgoZibandlela lonyaka kudlakela olwabakhona ilizwe lonke.
Igqwetha elimele uNgulube, elenhlanganiso yamagqwetha alwela ilungelo loluntu eyeAbammeli Lawyers for Human Rights, uMnu Nqobani Sithole uchasisa ngesigwebo lesi.
''Idale selibabambe belecala sekuthiwe bapike iminyaka eyisithupha owodwa ulahliwe uzavuswa uma bengadala icala phakathi kweminyaka emihlanu. Idale lithi icala abalidalayo lilesisindo esikhulu kakhulu okwenza ukuba ubulembu buvalwe lokhu asizange sikuzwe edale ngesikhathi icala leli lithonisiswa. Udaba lokuphikisa isigwebi lesi sizalukhweza edale leHigh sicele lemali yesibambiso ngesikhathi sisalinde ukuba icala leli lithethwe.''
Esethula isigwebo sakhe uMantshi Tashaya uchaze ukuba abane laba baphatheka kudlakela njalo basebenzisa inkundla zokuxhumana zebulenjini ukutshotshozela uzulu umvukela kwabangela ukuba uhulumende avale ubulembu okwensuku ezintathu.
Wengeze ethi icala leli lilesisindo esikhulu okwamagama esingadingi ukuthi umuntu angagwetshwa icommunity service lesicelo sokuthi bathethelelwe ngoba bedale icala okwakuqala singemukeleki.
UTashaya ebegwebe uNgulube labanye bakhe iminyaka eyisikhombisa kodwa wabeka eceleni owodwa ongabuyiselwa nxa bengadala icala elifanayo eminyakeni emihlanu elandelayo.
Ngemva kokwethulwa kwesigwebo inengi labantu likhalile, njalo izibotshwa lezi zize emthethwandaba zifakwe izankosi ezandleni lasenyaweni.
Besekungamaviki phose amabili izibotshwa lezi zilinde ukuzogwetshwa okubangele ukuba uTashaya ahatanise umtshutshisi ukuba adinge imota iyethatha izibotshwa.
Impahla ebikwa yabhidlizwa ngabane laba igoqela imota ezintathu lamafaseteli endlu, okubikwa kubiza amadola eMelika adlula inkulungwane eziyisifica minwe munye lengxenye –US$95 000.
UNgulube ukewama kukhetho olwedlule ezimele njengelunga ledale lephalamende eBulawayo South, kuthi uSibanda wayeme njengokhansila webandla lePeople First.
Amagqwetha abane laba akhangelelwe ukuphikisa isigwebo emthethwandaba waphezulu oweHigh Court bacela lokuthi bavunyelwe ukuhlawula isibambiso sebail besalinde ukulalelwa kwesicelo.
