Kulomuntu oyedwa olimele engozini yomlilo oqhamuke ebusuku ngoLwesithathu eMpilo Hospital, okutshe khona indawo zokuhlala zabodokotela labongi kanye lempahla elesisindo esifika ingxenye yesigidi samadola eMelika – US$500,000.
Obambe okwamanje isikhundla somqondisi wesibhedlela lesi, uSikhwicamfundo Solwayo Ngwenya, uthi umuntu olimeleyo uqhuzuke inqagala kuthi njalo omunye uhitshwe yintuthu.
UNgwenya, olobele ingcwadi uhlangathi lwezempilakahle ngokwenzekale eMpilo, uthi ababili laba bakhangelelwe ukuba bazaphepha ngesikhatshana.
Uthi kulemuli ezingamatshumi amane lanhlanu – 45 ezitshelwe yimpahla etshiyeneyo esibhedlela lesi okumele zithole indawo yokuhlala.
UNgwenya uthi abanye balakho ukuyahlala eLangeni Training Center lezinye indawo koBulawayo.
Uthi umlilo lo ulakho ukuthi uqale esititshini sikagetsi duzane lendawo lapho okuhlala khona odokotela labongi.
Konke lokhu kusahlolisiswa ngabakhangelane lezokucitsha umlilo edolobheni leli.
UNgwenya uthi lokhu ngokwesithathu ukuba kutshe izakhiwo esibhedlela lesi kusukela ngomnyaka ka2018. Izakhiwo ezimbili kazikalungiswa selokhu zatsha eMpilo Hospital.
Kulezisebenzi ezifika phose inkulungwane ezimbili lengxenye – 2,300 ezisebenza eMpilo Hospital. Isibhedlela lesi silezigulane ezivela endaweni ezibalisa iBulawayo Metropolitan, Matabeleland North leSouth, iNkabazwe leMasvingo.
IMpilo Hospital ilolonga izifundi ezisemakolitshini agoqela iNational University of Science and Technology leUniversity of Zimbabwe.