Uzulu obelokhu elenqwaba nqwaba zemali yedola leZimbabwe elingasasebenzi usezenelisa ukuthengisa limali ephiwe idola leZimbabwe phansi kohlelo uhulumende athi lujonge ukugqiba udaba lwedola leZimbabwe. Kodwa uzulu kathabanga ngesilinganiso semali azaphiwa yona. Nxa ule dola lakudala eliyi $5 uyaphiwa ifive cents, kuthi i$10, $20 le $50 uyaphiwa i20 cents i$100 endala ikupha i40 cents njalo i$500 ikupha i$2.
EleZimbabwe laqala ukusebenzisa imali yakwamanye amazwe agoqela eleMelika, South Africa le Botswana gomnyaka ka 2009 ngemva kokuba idola le Zimbabwe lingasenelisi ukuthenga sona isiwiji nje kuphela kufunakala ukuthi umuntu abe lenqwaba yamadola yokuthenga sona isinkwa nje kuphela.
Ezinye ingcwethi kwezomnotho zingcome lelinyathelo zisithi lizakhuthaza abamabhizimusi ukuthi beze elizweni ngobunengi ngoba litshengisa sobala ukuthi idola leZimbabwe eliseyi kuphenduka njalo.
Enye yalezi ngcwethi, UMnu. Prosper Chitambara utshele iStudio Seven ukuthi imali efakwe nguhulumende engamadola azinkulungwane ezingamatshumi amabili, $20 million kayisoze yenelise ukuthenga imali esezandleni zikazulu.
Enye njalo ingcwethi ecubungula ezomnotho welizwe, uMnu. Rejoice Ngwenya utshele uChris Gande weStudio Seven ukuthi inyathelo likahulumende leli kalincedi ngalutho.
