Omele ilizwe leMelika eZimbabwe uthi kunengi okwenzakala kwele Zimbabwe okubakhathazayo.
UMnu. Brian Nichols wethule amazwi la emhlanganweni awenze loMongameli Emmerson Mnangagwa ngoLwesithathu esigodlweni sikamongameli welizwe eHarare.
UNichols uthe, “Udlakela olwenzakala mhlaka 1 Ncwabakazi, ukubulawa kwabantu abayisithupha betshengisela emigwaqweni, ukuhlukunyezwa kwama polling agents awamabandla aphikisayo, ukuhlukunyezwa kwabantu emalokitshini awe Harare lokunye okunengi nengi ngokunye kokusikhathazayo thina njenge Melika njalo lenhlanganiso ezilwela amalungelo oluntu ezinjenge Human Rights Watch.
“Kunje sethule imibiko yokukusola konke lokhu njalo omunye umbiko siwethule simanyene labemazweni awe European Union.”
UMnangagwa uthi benze umhlangano obujonge ukuthuthukisa ilizwe leZimbabwe.
“Sibe lomhlangano ohambe kakhe kakhulu sibonisana ngesimo esikhona elizweni, esipha imibono yakhe lami ngisipha imibono yami.
“Ngakho-ke siqhubekela phambili njengelizwe nhalo nngithembisa ukuthi sizaqhubeka sibona ukuthi uzulu wakwele Zimbabwe uvikelwe njalo kulokuthula elizweni. Ukuze kube lentuthuko elizweni kumele kube lesimo sokuthula abantu bechelesile besehlukana imibono kodwa bengajikijelani ngamatshe.”
Ikhomishini yeZimbabwe Electoral Commission, esanda kwenza ukhetho lukamongameli, olwamakhansila lamalunga edale lephalamende, yathi uMnangagwa wanqoba kukhetho lokudinga umongameli omutsha.
Umanyano weMDC Alliance, ophikisa lokhu, usuphanyeke udaba lolu emthethwandaba weConstitutional Court.
Silokhe sikudaba olufanayo: Umthethwandaba ukhangelelwe ukuthi uzathonisa udaba lukaMnu. Tendai Biti ngoLwesine.
UBiti wetheswa icala lokumemezela ukhetho isikhathi singakafiki.
Kwokunye njalo okufanayo: Ezinye izizalwane zeZimbabwe ezihlala kwamanye amazwe zithi kwephula inhliziyo okwenzakala ekhaya.
Abaxoxa leStudio 7 bathi kuyamangalisa okwethulwe yikhomishini yeZimbabwe Electoral Commission ethi uMongameli Emmerson Mnangagwa wanqoba kukhetho lukamongameli olusanda kwenziwa.
Abanye bakhala ngokuthi umanyano weMDC Alliance wawuzanqoba kabazi kukhetho olusanda kwenziwa nga babambana phose lamabandla wonke abona ngezombusazwe.
UMnu. Mkhululi Ndabambi, ohlala eIndiana kwele Melika, uthi kunengi kakhulu okwenzakala kwele Zimbabwe okusolwa ngabanye abantu.
Kusenjalo, uMnu. Kumi Naidoo, unobhala jikelele wenhlanganiso elwela ilungelo loluntu eye Amnesty International, uthi bafisa ukukhuluma lohulumende ozangena esikhundleni ngokuthunjwa kuka Mnu. Itai Dzamara labanye.
UNaidoo uthi kuqakathekile ukuthi uhulumende omutsha adingisise okwehlela uDzamara ngomnyaka ka2015. UDzamara wayefuna ukuthi uMnu. Robert Mugabe asuke esikhundleni esithi sowehluleka ukubusa ngemfanelo.