Inhlanganiso yababalisi eyeZimbabwe Teachers Association(ZIMTA) ikhuthaza amalunga ukuthi abuyele emsebenzini ngemva kokukhalala umsebenzi okuqale ekupheleni kwenyanga kaMpandula kuhlandla lakuqala lokuvulwa kwezikolo. Linkuthazo kodwa isolwa ngezinye inhlanganiso ezimele ababalisi ezigoqela eye ARTUZ abathi ababalisi lokhe bethola iholo eliphansi elingabeneli ukuthi bagade baye emsebenzini.
Izikolo lokhe zavulwayo kuhlandla lakuqala kuze kufike elesithathu, inengi lababalisi bebengalugxobi ezikolo, kuthi abakade besenelisa ukuya khona bebetshona behlezi abafundi bengenzi lutho.
AbeZIMTA) babikwa benze isivumelwano lomqatshi phansi kwenkulumo ze National Joint Negotiating Council (NJNC). Kodwa abenhlanganiso eye Amalgamated Rural Teachers Union of Zimbabwe(ARTUZ) bahle bethula owabo umbiko bephikisa isivumelwano lesi besithi imali ethenjiswa ababalisi incinyane kakhulu.
Umnunzana Obert Masaraure umkhokheli we ARTUZ uchasisa ngezizatho ezibavimba ukubuyela emsebenzini.
"Ababalisi lokhe bengenelisi ukuthi babuyele emsebenzini amaphepha lezinye izivumelwano akungeke kwenze umsebenzi ubelula ebabalisini. Njenge nhlanganiso ye Amalgamated Rural Teachers Union of Zimbabwe sesifake eyinye indlela yokuthi kube lokhetho ezikolo lapho ababalisi abazafaka khona isinqumo sokuthi bayakufuna lokhu okukhulunyiweyo loba cha ngoba impilo zethu azihlelwa emhlanganweni. Inhlanganiso ye Amalgamated Rural Teachers Union of Zimbabwe yiyo ezasipha indlela isivela kwamanye amalunga enhlanganiso yikho lapha esizapha khona umbiko kuqhubeka kusiya phambili. Okwakhathesi ababalisi abenelisi ukuthi babuyele emsebenzini."
Umsekeli womkhokheli weZimbabwe National Educators Union i ZINEU, umnunzana Vusumuzi Maphosa ugcizelela kokutshiwe nguMasaraure.
“Thina njenge nhlanganiso ye ZINEU sidabukile ngalokhu okwenzakeleyo I kakhulu amanye ama unions eseqhuqhuzela ukubana ababalisi babuyele emsebenzini kungela abakutholileyo ngoba nxa kukhitshwa ama allowances akhona aweCovid lawa azaphela ngo December ababalisi bazabe sebe worse off kulalokhu abayikho khona njalo kuvulela lomqatshi ithuba lokubana ahlukuluze labo abalokhe besithi lokhu adebekufuna akukenzakali so thina njengamanye ama unions sisa consulter ukuthi sibone ukuthi siqhubeka njani ngalokhu ebesikuqalisile ukuze umbalisi athole isithunzi njalo athole lemali ethengayo .”
UDokotela Sifiso Ndlovu umqondisi weZIMTA uchasisa ngesivumelwano seNJNC.
“Lanxa I ZIMTA ibisala isemba phansi kufanele ukuthi kungabi lesivumelwano Kodwa ke kubekhona ukutshiyana kwembono enkundleni le, lapho inengi elithe hantshi kumele kusayinelwane phansi kuvunyelwane indaba le igqitshwe iphele kukhangelwe elakusasa. Inhlanganiso zonke ezingaphansi kweNJNC kugoqela kanye lenhlanganiso zababalisi lezo mqatshi zivumelene ngalokhu okufakwe nguHulumende njengeholo lokhu ke besekusitsho ukuthi iholo lithuthukisiwe lafakwa kuzinga laliqanjwe nguHulumende mhlaka 13 November ngaleyo ndlela sithethe umlandu wokuthi sicebise amalunga ethu ukuthi sekuyisikhathi ukuthi kubuyelwe emsebenzini”
Unkosikazi Sanelisiwe Dube olabantwana abafundayo uthi lokhu okweziwa nguHulumende kufana lokubabamba inkunzi ngoba bebhadalele ize.
“Ngendlela okwabikwa ngayo ukuthi izikolo ziyavulwa kwakungani kuzakwenziwa okukhulu ezikolo kanti akula lutho sibhadaliswa ischool fees kungelanto ezakwenzakala yikho ngisithi sabanjwa inkunzi. Inyanga ezimbili sibhadala imali ekwanileyo abantwabethu bengafundi kubuhlungu okunganani shuwa ngoba khathesi inengi asisebenzi kodwa kuthiwe abantwana bebhadale ifees aluba kukhona okwenziwayo kulungisa indleko zababalisi lathi esibhadala ischool fees ukuthi singazizwa sibanjwa inkunzi ngoba kubuhlungu ukuthi sibhadalele ize ngoba akusalanga insuku ezinengi ukuthi izikolo zivalwe.”
Ababalisi bathi bafuna iholo lamadola eMelika edlula amakhulu amahlanu-US$520 kodwa uhulumende ubathembise amadola eZimbabwe azinkulungwane phose ezingamatshumi amabili RTGS19,975. Imali le igoqela I allowance yokusebenza ngesikhathi esilengozi I COVID allowance kanye leBonus. Ababalisi bathi imali le izakwehla iye kunkulungwane ezingamatshumi lantathu RTGS 13,850.00 nxa sekukhitshwe eyeCOVID kanye le bonus ngakho bathi isivumelwano lesi senziwe kungakhangelwanga konke lokhu.
Imizamo yokuxhumana lomphathintambo obona ngezisebenzi zikahulumende, usikhwicamfundo Paul Mavima yehlule ngoba ubengadobhi ucingo lwakhe. Kodwa ugatsha olubona ngokuqhatshwa kwezisebenzi zikaHulumende olwe Public Service Commission lukhiphe umbiko luveza ukuthi izakwengezelela iholo lezisebenzi zikaHulumende kanye lendlela izisebenzi zakhe ezizabhadalwa ngazo imali zeBonus. Uthe njalo imali yebonus izabhadalwa ngamahlandla amabili kuqala ngenyanga ka Lwezi kuthi enye ibhadalwe ngenyanga ka Mpalakazi.
Umgcinisihlalo weApex Council unkosikazi Cecilia Alexander utshele iphephandaba le Herald ukuthi uhulumende wengeze imali yezisebenzi zakhe ngamatshumi amane ekhulwini – 41% kusukela ekuqaleni kwenyanga kaLwezi.
