Sokusele insuku eziyisithupha nje kuphela ukuze indaba zombongazwe zase Melika ziphele.
Ngemva kwengxoxo mpikiswano abazenze emphakathini, UNkosikazi Hillary Clinton usekhulume kakhulu ngomthelo we tax ongabhadalwanga nguMnu. Donald Trump kuthi-ke uTrump uhlasela uClinton ngencwadi zama emails okuthiwa kazibambanga kahle esasebenzela uhulumende kaMongameli Barack Obama.
Ukuze sizwe okunengi okungenzakala emthethweni kulokhetho lukamongameli omutsha wase Melika, iStudio 7 ixoxe lo Mnu. Kudakwashe Hove, oyi Legal and Information Officer kunhlanganiso ye Veritas, kusobala ukuthi kulokulwisana okumangalisayo phakathi kukaTrump loClinton ikakhulu kudaba lwencwadi zama emails.
UMnu. Hove uthe okungaba licala yikuthi uClinton engabe wathumeza incwadi zama emails ngendlela engaqondanga loba nje lokhu kungakaphumeli egcekeni.
“Abantu abaphuma kumanye amazwe bashona bekhangela ilizwe le Melika njengendawo lapho abantu abahlonipha umthetho.”
UMnu. Hove uphinde wathi indaba le yencwadi zama emails kaNkosikazi Clinton ikibeka ngceke ukuthi umthetho eMelika ulamandla.
“Ngombono wami abantu abaningi kudala bekhethile ukuthi bafuna ukuvotela ibandla liphi.”
UHove ekhuluma kabanzi ngendaba kaTrump yomthelo we tax kanye langendaba kaClinton eyama emails, uthe abantu abambalwa bazokwenza isinqumo sokuvotela umkhokheli omutsha phakathi kukaMnu. Trump lo Nkosikazi Clinton becabanga impumela yecala likaNkosikazi Clinton kumbe uhlangothi lwe Internal Revenue Services uma bekhuluma ngendaba zomthelo kahulumende kaTrump.
Ukhetho luka mongameli wase Melika luzakwenziwa ngeviki ezayo.
