Inhlanganiso ezizimeleyo ezikhangelane lamalungelo kazulu zithi lokhe zibhekana lobunzima kundlela ezisebenza ngayo eZimbabwe kulokwesabela ukuba zingaphinda zibhekane lenkinga zokungenelisi ukusebenza zikhululekile.
Ele Zimbabwe lilenhlanganiso ezizimeleyo eziqhuba imisebenzi etshiyeneyo egoqela ukulwela amalungelo oluntu, ukumela abantwana, ukufundisa abantu ngesisekelo sombuso welizwe, ukumela abaphila lobugoga labafelokazi lokunye.
UMnumzana Trust Nhubu, osebenzelana lenhlanganiso ezimela amalungelo abatsha, uthi inkinga yikuba imisebenzi yenhlanganiso ezinje isuka ithathwe njengemisebenzi ephathelane lezombusazwe okwenza ukuba zihlolisiswe ziphinde zihlukuluzwe.
UMnumzana Nhlanhla Ngwenya wenhlanganiso Media Institute of Southern Africa-Zimbabwe uthi imbali yeZimbabwe ikhomba ukuba inkinga ezinje zivame ukwenzakala ngezikhathi zokhetho kumbe kukhankaselwa ukhetho okuyinto emele inhlanganiso lezi ziqaphele kusikhathi esikiso.
Umumo obusube ngconywana kulandela ukubunjwa kukahulumende womanyano eZimbabwe usuke waguquka kulandela ukhetho olwenziwa ngomnyaka ka 2013.
UMnumzana Rejoice Ngwenya, okhokhela inhlanganiso ezimeleyo eye COMALISO, uthi ezinye zenhlanganiso lezi zacina zivala ngenxa yezizatho ezithile okugoqela ukusilela kosekelo lwemali.
UNgwenya uphinde wathi “ilizwe licine selilahlekelwa layizisebenzi labacebisi benhlanganiso ezizimeleyo abalolwazi olujulileyo bekhetha ukuyasebenzela kwamanye amazwe abafana loMnumzana Brian Kagoro.
Inhlanganiso ezisebenzelana labantu emaphandleni zibhekana lodubo oluphindwe kabili ngokungenela kwezombusazwe kudingakala ukuba kuphunywe leziqondiso ezingakhokhela ekuthini kucandwe indlela ezichachileyo zokusebenzalana kwazo lohulumende endaweni ezitsiyeneyo zelizwe zingakasunguli umsebenzi.
Ingcitshi kwezombusazwe zithi uhulumende wesabela ukulahlekelwa lusekelo emaphandleni ngakho-ke ucina esola ezinye zenhlanganiso lezi ngokusebenzisa uncedo lokudla kwabadubekayo emaphandleni njengendlela yokuphazamisa uhulumende.
