UMongameli weMelika uMnu Donald Trump wethule amazwi akhe amqoka phambi kwamadale ePhalamende, iCongress, womabili ngoLwesibili kusihlwa wazikhukhumeza kakhulu esithi usefeze okunengi phakathi kwenyanga ezimbili kuphela esembusweni.
UTrump ukhulume njalo ngokudutshulwa kwakhe ngesikhathi ekhankasela ukhetho nyakenye esithi, “Ngasindiswa nguNkulunkulu ukuze ngiphakamise iMelika ngiyibuyisele esimeni sayo sokuba lilizwe elilamandla.”
UMongameli Trump uthe uqhube kuhle kakhulu umsebenzi ngenyanga yakuqala esembusweni ukwedlula abanye bonke oMongameli beMelika.
“Kumaviki ayisithupha edluleyo, ngisayine iziqondiso ezifika phose ikhulu ngathatha izinqumo zokubuyela ekwenzeni izinto ezilengqongo,” kutsho uTrump.
“Abantu bangikhetha ukwenza umsebenzi futhi ngiyawenza lamanje. Eqinisweni, abantu abanengi bathi inyanga yombuso wethu yakuqala ibe lempumelelo enengi ukwedlula eminye imibuso embalini yelizwe lethu.”
UMongameli Trump ukhulume njalo ngendaba ezitshiyeneyo ezigoqela olokukhulisa umnotho, ukwehlisa imithelo lentengo yempahla, ukuqeda impi ephakathi kweUkraine leRussia, kanye lodaba olusegudwini kulezinsuku olwemithelo ayethese eleChina, eleMexico leleCanada.
Amazwe la aphindisele lawo ngemithelo efanayo.
UTrump uthe kubalulekile ukuthi impi yeRussia leUkraine iqedwe ngoba isibulalise abantu abanengi.
Wengeze wathi lanxa umhlangano wakhe loMongameli weUkraine uMnu Volodymyr Zelensky ungahambanga kuhle ngeviki edluleyo, uZelensky umbhalelwe incwadi emazisa ukuthi uzimisele ukusayina isivumelwano leMelika esizakhokhelela kunkulumo zokukhumisana umlotha leRussia.
Ekhuluma ngesinqumo sakhe sokumisa imali eyayiphiwa amazwe atshiyeneyo yiMelika uMongameli Trump uthe imali le yayidlaliswa inikwa amazwe agoqela aseAfrica afana leLesotho, Liberia, Mozambique, Zambia, leUganda lapho athi yayisetshenziswa ukuthuthukisa ubutabane, ukusoka lezinye inhlelo ezingelamsebenzi.
UTrump sole kakhulu owayenguMongameli weMelika phambi kwakhe uMnu Joe Biden esithi uyisehluleki sokucina esatshiya sibulele umnotho.
Uthembiswe uthuthukisa iMelika "idlondlobale ngendlela engakaze ibonakale."
Uqhubeke esithi, “Injongo yami emqoka yikuhlenga umnotho ukuze izimuli ezisebenzayo ziphefumule kuhle. Njengoba likwazi, uhulumende odluleyo usitshiyele umnotho oguqe ngamadolo lentengo ezikhuphuka njalo-nje.”
“Imithetho yabo yakhuphula intengo yamafutha, ukudla futhi yabangela ukuthi indingeko zempilo ezibalulekileyo zingeneliswa yizigidi zabantu beMelika.
“Intengo zaqonga ngezinga elingakaze libonakale eminyakeni engu-48; mhlawumbe embalini yelizwe lethu futhi. NjengoMongameli, ngilwisa nsukuzonke ukulungisisa konke lokhu ngenze iMelika yaneliseke njalo,” kutsho uTrump.
Ophendule amazwi kaTrump emele ibandla eliphikisayo elamaDemocrats uSenator Elissa Slotkin usole umbuso kaTrump esithi uyingxabangxoza.
USlotkin uthe uTrump uyehluleka ukwehlisa intengo yezinto lanxa nje wathembisa ukwenza lokhu "ngosuku lwakuqala" ngesikhathi ekhankasela ukhetho.
USenator Slotkin uchothoze njalo uMongameli Trump ngokuxotsha izisebenzi zikahulumende ezinengi esebenzisa ugatsha lweDepartment of Government Efficiency (DOGE), olukhokhelwa yinkisela enothe ukwedlula umuntu wonke emhlabeni jikelele uMnu Elon Musk, yena obekhona laye eCongress.
Amalunga eCongress awebandla likaTrump, elemaRepublicans, awajabulele kakhulu amazwi akhe njalo ebeqakeza ngaso sonke isikhathi kodwa abebandla lamaDemocrats bebedangele, abanye babo bephethe amabhakane asola umbuso kaTrump.
Elinye Ilunga lamaDemocrats uMnu Al Green uxotshiwe ePhalamende ngemva kokukhomba uMongameli ngodondolo ememeza esithi uTrump akalalo ilungelo lokuhlehlisa inhlelo eziphathisa uzulu.
Forum