Abamabandla ezenkolo bathi bakhathazekile ngokusebenza kwekomishini ebona ngezokukhumisana umlotha eyeNational Peace and Reconciliation Commission (NPRC) bethi ilakho ukuba ingakhululekanga.
Lokhu kuphume emhlanganweni owenziwe ngoLwesihlanu phakathi kwekhomishini labafundisi bamabandla ezokholo lwesiKhristu.
Kukhulunywe ngokuthi ikhomishini le ingasebenza njani lamabandla ezenkolo lokunikeza amabandla ithuba lokwethula abafisa ukuthi ikhomishini izilandele ukuze isimo sokukhumisana umlotha lokuthethelelana kuhambe kahle.
Ezinye zezifiso zamabandla zigoqela ukukhululeka kwekhomishini ingaqondiswa nguhulumende, ukuthi iphiwe imali lokunye okudingakalayo okwaneleyo ukuze yenelise ukusebenza ngendlela, udaba lombuqazwe weGukurahundi iqakathekiswe lokuthi okhomishina bakhulume indimi zabantu abehlukeneyo njalo babe lamahofisi ezabelweni zonke zelizwe.
Umfundisi Useni Sibanda uthe kuqakathekile ukuthi ikhomishini isebenze izimele ingangenelwa ngezombusazwe.
UMnu. Mandlenkosi Mkhize uthe kuqakathekile ukuba udaba lweGukurahundi lungalinganiswa lezinye ingxabano ezabakhona elizweni.
UMnu. Cosmas Mlambo yena uthi njengoba okhomishina bakhethwa ngumongameli welizwe abalamandla okubopha loba ukuthonisisa owabakhethayo.
Umngcinisihlalo wekomishini, uRetired Justice Sello Masole Nare uthi umthetho uyabavumela ukubiza yiloba ngubani ukuzofakaza phambi kwabo okugoqela uMongameli Emmerson Mnangagwa.
Ikhomishini yeNPRC ithi izaba lomhlangano omkhulu ozahlanganisa izabelo zonke zelizwe eHarare lapho okuzavunyelwana khona amanyathelo azathathwa yikomishini ukulungisisa inhlupho zokungezwani elizweni.
