Umthethwandaba kamantshi ePlumtree usuqalisile ukuthetha icala eletheswa abazali babantwana abafunda eMakuzeze Primary School eMangwe eMatabeleland South elokwethuka kanye lokwethusela umphathisikolo uNkosikazi Victoria Pasipanodya lomkhakhe ofundisa kulesisikolo kanye lomsekeli wakhe ngodaba lokutshaphazwa kwemali kulesisikolo kanye lenkethabetshabi.
Igqwetha elimela abetheswa icala uMnu. Dumisani Dube uthi abazali abedlula amatshumi ayisikhombisa, bekhokhelwa yinduna kanye lokhansila webandla leZANU PF kulesisigaba babikwa batshengisela kulesisikolo, besithi kungani umphathisikolo exotshe ababalisi abakhuluma ulimi lweSiNdebele lesiKalanga bona kuyibo ababesebenza gadalala kulesisikolo.
Abetheswa icala laba bazabuyela emthethwandaba ngenyanga kaMfumfu ngoba incwadi yomtoliki wolimi lweSiSuthu olusetshenziswa ngomunye isifuna ukudindwa kutsha.
UDube utshele uSithandekile Mhlanga weStudio 7 ukuthi bayaliphika icala lenkethabetshabi njalo balobufakazi bokuthi imali yatshaphazwa obumunyethwe lugwalo lwe Audit, oluvezwe emthethwandaba.
