Kulandela ukubotshwa lokuvalelwa ejele kwamalunga ebandla leMRP abalisa uVanet Ncube, Welcome Moyo loMarshall Sibanda, uMongameli weMRP, uMnu Mqondisi Moyo ulobele uMongameli Emmerson Mnangagwa incwadi esola lesisenzo.
"Sengilobele uMongameli Emmerson Mnangawa ugwalo ngisola ngesenzo sakhe sokubopha amalunga ethu amathathu ababotshwa kumnyaka odlule kuleCommission kaMontlante ngemva kokuba uMkhwananzi etshengise likhomishini isithombe sikaMongameli ukuba waphatheka ekubulaleni abantu ngombhuqazwe weGukurahundi.''
UMoyo uthi amalunga ebandla lakhe awalacala.
“Okumele babotshwe ngamalunga ebandla elibusayo abayibo abaqala umsindo bephikisana lobufakazi bukaMkhwananzi. UMongameli Mnangawa lamasotsha adubula abantu ngomnyaka odlule yibo okumele babotshwe ngitsho laye uMongameli kumele abotshwe ngoba waphatheka kumbhuqazwe weGukurahundi.''
Umgcinisihlalo weMRP uMnu Mqondisi Ndebele uthi usekela incwadi elotshelwe uMnangagwa.
“Njengebandla sayayisekela incwadi elotshelwe uMnangagwa.UMnangawa engasebenzisi amapholisa lezisebenzi zedale ekuhlukuluzeni abantu ababotshiweyo kodwa abasebenze kuhle lokhu sikubona ngemisebenzi yabo ngoba labo abakhuluma kukhomishini kaMontlante sebebotshiwe, ngakho yena uMnangagwa kasebenzise amandla akhe lababantu bakhululwe."
Olwela amalungelo oluntu, unobhala jikelele weIbhetshu likaZulu uMnu Mbuso Fuzwayo uthi umongameli weMRP wenze kahle ngokulobela uMnangagwa incwadi.
“Kuyinto enhle eyenziwe ngamajaha eMRP ukuthi babhalele uMongameli. Abantu ababotshiweyo babekhuluma kukhomishini bekhuluma ngezikhalazo zabo angithi wathi yena ''the voice of the people is the voice of god'' yena uma abantu bethe nguye owabulala abazali bakhe kulokubabopha kaveze ubufakazi obutshengisa ukuthi kakwenzanga kodwa kuyacaca ukuthi isandla sakhe sigcwele iazi labantu bakithi ngakhoke yena kangababophi kodwa kaveze ubufakazi. "
Abathathu laba bavalelwe eKhami Prison NgoLwesihlanu balinde ukugwetshwa NgoLwesithathu kuyonale iviki. Kuncwadi yakhe uMongameli weMRP usesole ukusebenza kwedale ezweni kanye loMongameli Mnangagwa ethi abathathu laba abalacala kabakhululwe.
