Inengi labantu elizweni libikwa lisithi liyamethemba umongameli Robert Mugabe, isilinganiso sokungamatshumi phose amahlanu-47%, labo besithi bazimisele ukumvotela kukhetho lukamongameli laloba lungenziwa kusasa. Kodwa isimanga yikuba abanengi bathi abakhululekanga ukumchothoza, bevumelana njalo ekuthini umnotho welizwe uyaqhubeka usiba mubi.
Impumela yalenhlolisiso eyenziwe yinhlanganiso ye Mass Public Opinion Institute- MPOI, eyenziwe ngoNtulikazi lonyaka, ezigabeni zonke zelizwe, imangalise abanengi, kulokwehlukana kwemibono eveziweyo.
Ingcwethi kwezomnotho zicabangela ukuba lokhu kwehlukana kumibono, kubangelwa yikwesabela ukuhlukuluzwa, ngoba besazikhumbula izehlakalo uzulu athe wahlangana lazo eminyakeni edlule.
Umnumzana Brian Kauma ongomunye wabathatha izifundo zaphezulu ze Masters kuhlangothi lwezomnotho ekolitshini leUniversity of Zimbabwe. Lanxa imangalisa abanengi limpumela, uKauma uthi zinengi izizatho ezicatshileyo ezibangela indlela uzulu abeka ngayo imibono yaloluhlobo.
UKauma uthi akaboni isiba khona inguquko emicabangweni kazulu, ngoba labontanga beqhubeka befunda kulokho abakubona kusenziwa ngabadala, bezaqhubeka belandela indlela ezigcwele ukwesaba.
Umnumzana Vuyisile Prescious Moyo ungomunye wabacubunguli abaphatheke kulenhlolisiso, eyisifundi njalo se University of Zimbabwe. UMoyo uthi akamangaliswa yilokho kupicana kwemicabango yabantu.
Uzulu ulale imibono ngoba sewalahlekelwa lithemba kumabandla ezombusazwe aphikisayo elizweni kutsho uMoyo.
Isimanga njalo yikuba uzulu othembela kumongameli Mugabe, engazithembi inhlangothi azikhokhelayo, engazithembi ngitsho lakancane.
Lezi ngezibalisa olubona ngezokuqhutshwa kokhetho olwe Zimbabwe Election Commission – ZEC, amapholisa, olubona ngezokuhlawuliswa kwemithelo olwe Zimbabwe Revenue Authority – ZIMRA kanye lokuba isilinganiso phose sokuphakathi laphakathi, sabantu elizweni sebalahla ithemba kumabandla ezombusazwe aphikisayo.
Ingcwethi kwezomnotho lokucubungula zona ziqina ngelokuthi okuvezwe nguzulu, kubangelwa yikusilela kolwazi elizweni phezu kwezokuqhutshwa kwenhlelo zentuthuko elizweni.
Kukhanya uzulu ebeka ezinye inkokheli umlandu wokungaqhubi kuhle umsebenzi, uMugabe embona njengomuntu omsulwa kulokho kwehluleka kwazo, ophoxwa yilabo abakhethayo ukuba baqhube limisebenzi.
