Abantu abanengi eZimbabwe bathi luqakatheke kakhulu usuku lwabomama olweMothers’ Day, olunanzwa emhlabeni wonke jikelele.
Banengi abananza usuku lolu eZimbabwe abathi omama ngabantu okumele bahlonitshwe njalo bakhathalelwe ngoba yibo insika yemizi.
UNkosazana Thandiwe Mpala wakoBulawayo ubonga kakhulu bonke abesifazane abamenza waba ngumuntu ebantwini.
“Umama wayenginakekela imihla yonke, lapho ma ngigula, umama wayebona amacebo okubana angangisiza kanjani ukuze ngisile. Umama uqakathekile empilweni yami kakhulu ngoba wayenginakekela kusukela ngimncane, lapho ebona ukuthi sokufanele ukuthi ngiye esikolo, ebona ukuthi kumele ngihambe esikolo, kumele ngithwale umphako, kumele ngibe lamabhuku eneleyo ukubana ngiyefunda.”
UMaMpala uthi luqakatheke kakhulu usuku lwabomama.
“Mama, ngiyakubonga kakhulu ngoba kungesuwe kube kangikho kulesi simo engikiso lamhlanje. Mama, ngiyakubonga kakhulu ngoba wena nguwe owangondlayo ngaze ngafika kulesi sikhathi ngilokhu ngisaphila. Mama, ngiyakubonga ngoba lakhathesi nxa ngikutshela izinkinga zami, uyasukumela phezulu, ungisize lapho okufanele ungisize khona, ungibonise lapho okumele ungibonise khona. Umama kumele simthande, kumele simhloniphe, lapho esibonisa, sibone ukubana siyalandela.”
UNkosikazi Chenai Ncube laye uyaluthakazelela usuku lwabomama.
“IMothers’ Day lilanga lapho esithakazelela khona omama bethu, abasizalayo lalabo abangasizaliyo, ostep mum, obabakazi, ogogo, osisi, labo abathethe izicathulo zika mama. Ilanga leli silithatha sibabonga although we don’t to do it ngelanga lona leli elilodwa. Happy Mothers’ Day.”
UNkosikazi Nokuthula Siziba, ohlala eChitungwiza, laye uthi usuku lolu lumenza ajabule kakhulu.
“Ngoba yilo ilanga lapho esithola khona izipho labanye omama. So iMothers’ Day ngiyayijabulela kakhulu, ngoba yikho esitshengiswa khona uthando oluvela kubobaba, besitshengisa uthando ukuthi lathi sibe ngomama njalo siyabasiza kwezinye izinto. “Siyabawatshela, siyabathwalela abantwana for nine months, so labo yilo ilanga labo elokuthi basisipoyile njengabomama. Hayi, mina ngiyalijabulela kakhulu leli langa ngoba lezinye izipho engizitholayo, angikaze ngizithole. So, hayi ngiyalujabulela kakhulu usuku lolu lwabomama.”
UNkosikazi Pretty Hloe ulombono ofanayo.
“Ngizizwa ngijabulile kakhulu, kutshengisela ukuthi lathi omama kulumhlaba lo, siyaqakathekiswa. Kambe i-nine months uthwele umntwana nxa usumbamba ngezandla zakho kuyajabulisa. Happy Mothers’ Day kubo bonke omama.”
Abanengi bathatha lelithuba ukuthengela omama babo izipho ezehlukeneyo, bebathumezela lamaluba lamakhadi amumethe imibiko ebonga imisebenzi yabo.
Usuku lolu kwele Melika lwasungulwa ngomnyaka ka1908 nguNkosazana Anna Jarvis, owayebonga akwenzelwa ngunina, uAnn Jarvis. UNkosazana Anna Jarvis wasungula indawo zabo mama ezinengi eMelika ezazibizwa ngokuthi ngama Mother’s Day Work Clubs. Usuku lweMothers’ Day namhlanje solunanzwa emhlabeni wonke jikelele.