Inkokheli yamabandla amakhulu azancitisa kukhetho lwelizwe oluzakwenziwa ekupheleni kuka Ntulikazi yehlulekile ngoLwesine ukuya emhlanganweni eHarare obuqoqwe ngamabandla ezokholo obubiswa ngokuthi yiChurches, Multitudes and Citizens Interface Meeting.
Abangahambanga emhlanganweni lo bagoqela umkhokheli womanyano weMDC Alliance uMnu. Nelson Chamisa kanye loMongameli Emmerson Mnangagwa webandla leZanu PF.
UChamisa wehlulele ukuya emhlanganweni lo ngoba ubesemhlanganweni omkhulu awenze lozulu eKariba esabelweni seMashonaland West.
Akwaziwa ukuthi uMnangagwa ubanjwe yini ukuthi aye emhlanganweni lo.
Umqondisi we Arupe Jesuits University, uFather Arnold Moyo, uthe akulunganga okwenziwe yinkokheli yamabandla eyehluleke ukubuya emhlanganweni lo obukhulekela okwenzakala eZimbabwe ngesikhathi sokhetho.
Inkokheli yamabandla engene lumhlangano ibalisa ozancintisa emele umanyano w Coalition of Democrates, uMnu. Elton Mangoma, owe Rainbow Coalition uNkosikazi Joice Mujuru, umkhokheli we Alliance for People’s Agenda, uDokotela Nkosana Moyo labanye abathumele abameli babo.
Inhlanganiso zabokholo lwesiKhristu ebezikulomkhosi zigoqela iZimbabwe Catholic Bishops Council, Evangelical Fellowship of Zimbabwe, Zimbabwe Council of Churches leye Zimbabwe Council of Pentecostal Churches.
