UMongameli Emmerson Mnangagwa, ongunombala webandla leZanu PF, uthi kumele abalandeli bebandla leli basebenze ndawonye ukwenzela ukuthuthukisa ilizwe leZimbabwe.
Wethule lokhu ngoLwesine emhlanganweni wedale leCentral Committee ngesikhathi kulungiselelwa umhlangano omkhulu oweAnnual People’s Conference ozakwenzelwa eGoromonzi, esabelweni seMashonaland East.
UMnangagwa uthe kuqakathekile ukuthi kulungiswe umnotho welizwe ukwenzela ukuthi abantu bahlalekahle eZimbabwe.
Umhlangano ozakwenzelwa eGoromonzi ulesihloko esithi ‘Merchanise, Modernise and Grow the economy towards vision 2030’.
Ilunga leZANU PF elivela ko Bulawayo elizakuba semhlanganweni lo, uMnu. Munashe Mtusa, uthi lumhlangano uqakathekile ngoba kumele kulungiswe umnotho welizwe obhidlikayo.
Omunye njalo okubandla leli ongumsekeli kanobhala wogatsha olubona ngokuqhutshwa kwemisebenzi etshiyeneyo kuhlangothi lwabatsha, uMnu. Mabutho Moyo, ugcizelele esithi ibandla leli alisoze linqotshwe kukhetho oluzakwenziwa ngomnyaka ka2023 ngoba abantu bayalithanda njalo liqhuba izifiso zikazulu sonke isikhathi.
Kodwa enye ingcwethi ecubungula ezombusazwe, uMnu. Mlungisi Dube, uthi akulalutho oluzaphuma emhlanganweni lo ngoba vele ibandla leli kalibananzi abantu beZimbabwe njalo kuyilo elenza izinto zibe zimbi elizweni.
Umhlangano lo wenziwa ngesikhathi kucatshangelwa ukuba kulokulwisana phakathi kuka msekeli kaMnangagwa lomsekeli wakhe, uMnu. Constantino Chiwenga.
Kodwa isikhulumeli sebandla leli, uMnu. Simon Khaya Moyo, wazise ukuba akusoze kube lokhetho emhlanganweni lo, esithi kuzaxoxiswana ukuba ilizwe lingaqhutshwa njani.
