MDC-T: Asisoze Siye Ekuvulweni KwePhalamende

WASHINGTON DC —  Ibandla leMDC-T lithi amalunga alo kasoze aphatheke emkhosini wokuvulwa kwedale lephalamende nguMongameli Robert Mugabe ngeviki ezayo.

UMugabe uzavula lelidale ngoLwesibili. Kodwa iMDC-T ithi ayisoze iye kulumkhosi ngoba ikhonona ngokhetho lapho uMugabe anqobe khona uMnu Morgan Tsvangirai.

Lelibandla lithi njalo amalunga alo ephalamende kasoze aphatheke kukhetho lokudinga umlawuli walelidale. IZanu PF ikhangelelwe ukukhetha uMnu Jacob Mudenda ukuthatha lesisikhundla.

Umlawuli wephalamende edluleyo bekunguMnu Lovemore Moyo, umgcicisihlalo weMDC-T.

Umsekeli wesikhulumeli salelibandla uMnu Joel Gabuza utshele lumsakazo ukuthi ukungayi kwabo kulumkhosi kuyindlela yabo yokutshengisela ukukhonona ngendlela ukhetho olwaqhutshwa ngayo.

"Indaba ekhona yiyonaleyo esivele sikhala ngayo eyokuthi ubaba lowana (uMugabe), ukuwina kwakhe asivumelani lakho," kutsho uMnu Gabuza.

Kodwa isikhulumeli seMDC ekhokhelwa nguMnu Welshman Ncube, uMnu Nhlanhla Dube uthi amalunga abo ephalamende azaphatheka ekuvulweni kwedale, esithi ukungayi akubasizi ngalutho.

"Sikubona kuyikudlalisa isikhathi," kutsho uDube.

Isiphathamandla seZanu PF uMnu Joram Gumbo usole kakhulu inyathelo leMDC-T.