Umkhokheli weMDC-T uMnu. Morgan Tsvangirai uthi abantu abathakazeleli lutho ngalesisikhathi sekhefu lekhisimusi ngoba uhulumende kamongameli Mugabe esehluleka ukuvuselela umnotho welizwe.
Esethulela intathelizindaba eHarare ngoLwesithathu umbiko webandla lakhe owokugqiba lumnyaka ka2014, uMnu. Tsvangirai wengezelele wathi okungaqeda loluhlupho yikuthi kube lokhetho olukhululekileyo khona kuzakuba lohulumende ofunwa ngabantu hatshi obusa ngokuqilibezela kukhetho.
Uthe lanxa impahla zikhona ezitolo, abantu abalamali zokuzithenga njalo inengi liphila ngokuthengiselana okutshiyeneyo ngendlela yokuziphilisa.
UMnu Tsvangirai uphinde wathi uhulumende webandla leZANU PF wathembisa ukubumba imisebenzi edlula ezigidi ezimbili (2, 2 million) kodwa lokhu akwenzakalanga.
Wengezelele wathi umongameli Robert Mugabe kasathathisisi kuhle engqondweni kukanti lomkakhe uGrace osengena kwezombusazwe utshengisela ukuthi ulolunya.
Ukucubungula okunengi okukhulunywe nguMnu. Tsvangirai sixoxe lomqoqi wenhlelo zalelibandla uMnu. Abednico Bhebhe, yena oqale ngokuchasisa ukuthi kungani ibandla lakhe lisithi umumo womnotho welizwe wawungcono kuseselohulumende womanyano.
