Icele leMDC elikhokhelwa nguMnu. Morgan Tsvangirai lamuhla lilobele isikhulumeli sedale lephalamende uMnu. Jacob Mudenda kanye lomkhokheli wedale leSenate uNkosikazi Edna Madzongwe lisithi kabaxotshe amalunga alelidale ahlamukela lelibandla ayabumba elinye elizibiza ngokuthi yiRenewal Team, agoqela owayengunobhala jikelele walelibandla uMnu. Tendai Biti, ngoba angena kulelidale engaphansi kweMDC-T.
Lokhu kutsho ukuthi iphalamende ingavuma isikhalazo seMDC-T, izihlalo zamalunga alelidale alitshumi lanhlanu kanye lezintathu zedale leSenate zizasala zitshaya ibhungane.
Okhethwe ukuba yisikhulumeli salelibandla emhlanganweni omkhulu oweCongress ophele ngeNsonto uMnu. Obert Gutu utshele intathelizindaba eHarare ngoLwesine ukuthi isinqumo lesi sithethwe kulowomhlangano.
Emhlanganweni walamuhla, i-MDC-T ithe ayisoze iphatheke kukhetho oluzayo uhulumende engananzanga imithetho yokuqhuba ukhetho olukhululekileyo eye Electoral Reforms.
Kodwa igqwetha lababikwa bahlamuka kulelibandla, uMnu. Jacob Mafume uthi ukuxotshwa kwamalunga eRenewal Team akukho emthethweni.
Amazwi akhe agcizelelwe nguMnu. Watch Sibanda, uSenator weMatabeleland South, laye osexotshwa kudale leSenate, yena otshele uSithandekile Mhlanga weStudio 7 ukuthi udaba lokuthi i-MDC-T eqotho yiphi lulokhu lusemthethwandaba.
