Inkokheli yecele leMDC elikhokhelwa nguMnu. Morgan Tsvangirai ithi luqhubeka kuhle uhlelo lwalelibandla elokukhetha abazincintisa ezikhundleni ezitshiyeneyo emhlanganweni walo we congress osekupheleni kwenyanga ezayo, lanxa amanye amalunga alelibandla esithi kulengxabangxoza ebangelwa yikulwisana kwamaxuku aphikisanayo phakathi kweMDC-T.
Isikhundla esesidale inkulumo koBulawayo ngesikamgcinisihlalo esatshiywa ngomela iMakokoba edale lephalamende uMnu. Gorden Moyo. Kubikwa elinye ixuku lifuna ukuthi sithathwe ngumsekeli kaMayor wedolobho uMnu. Gift Banda lanxa ebikwa eleminyaka embalwa kuphela engene kulelibandla.
Umsekeli kamqoqi wenhlelo zalelibandla uMnu. Abednico Bhebhe onguye oqhuba loluhlelo uthi luqhubeka ngemfanelo njalo ibandla lakhe alisoze likhulume ngokulwisana, nxa kuyikuthi kukhona, njengoba ezinye izigaba zingakakhethi abazancintisa.
