Ibandla leMDC-T, elikhokhelwa nguMnu. Douglas Mwonzora, lithi selimise ubudlelwano okwesikhatshana loNkosazana Thokozani Khupe, umsekeli kaMwonzora. Ibandla leli lithi kunengi uMaKhupe akwenzileyo okungahambelani leziqondiso zesisekelo somthetho webandla leli.
Lokhu kwenzakala ngesikhathi libandla leMDC-T lilungiselela ukhetho oluzakwenziwa lonyaka emhlanganweni omkhulu oweCongress. UMaKhupe kuthiwa uyadelela njalo kasekeli konke okwenziwa nguMwonzora.
UMnu. Witness Dube, obona ngokwethulwa kwemibiko kubandla leMDC-T, uthi kusahlolisiswa okunengi okwenziwa nguMaKhupe okungahambelani lokumele kwenziwa ngumuntu okubandla leli.
UDube kazange afise ukwethula okwenziwe nguMaKhupe okwephula imithetho yebandla leMDC-T.
Kodwa abalandeli baka MaKhupe bathi uMwonzora uzama ukuzivikela ukuba enganqotshwa nguMaKhupe kukhetho oluzayo.
UMnu. Ntando Ndlovu, umcebisi kaMaKhupe, utshele iStudio 7 ukuthi uMwonzora kalalungelo lokususa uMaKhupe esikhundleni kumbe ukumisa okwesikhatshana ukuba lilunga lebandla leli.
