Ibandla leMDC-T elikhokhelwa nguMnu. Nelson Chamisa selichothoze inhlanganiso ebona ngokuqhutshwa kokhetho eyeZimbabwe Electoral Commission (ZEC) ngokuloba ibizo likaMnu. Emmerson Mnangagwa phezulu kwesiqa sesibili kuluhlu lwamabizo abancintisa kusikhundla sokudinga umongameli welizwe ekupheleni kwayonale inyanga.
Isiphathamandla salelibandla uMnu. Jameson Timba utshele intathelizindaba ngoMvulo eHarare ukuthi bekufanele uluhlu lwamabizo la lube lunye lulandela i-alphabet, kulokuthi luqunywe phakathi ngenjongo yokuthi ibizo likamongameli Mnangagwa, oncintisa kubandla leZANU PF, libesekuqaliseni koluhlu lwesibili.
Isiphathamandla seZEC uMnu. Utoile Silaigwana uvumile kuStudio 7 ukuthi kufanele kulandelwe i-alphabet, kodwa wathi ufuna ulotshwe phansi umbuzo wokuthi kungani uluhlu lolu lungabanga lunye, ngakho sisalindele impendulo.
Ukuhlaziya loludaba, sixoxe loMnu. Bernard Bhekilizwe Ndlovu, ingcwethi ecubungula ezombusazwe.
UMnu. Ndlovu uthi akuqakathekanga ukuthi i-MDC-T ikhonone ngaloludaba ngoba abavotayo bazawubona umfanekiso walowo abafuna ukumvotela.
