Umsekeli kamongameli uMnu. Emmerson Mnangagwa ngoLwesithathu wethulele idale lephalamende umbiko oqondileyo okuyiwo obekufanele ubalwe ngumongameli Robert Mugabe izolo, kodwa wathi akudingeki ukuthi axolise lelidale ngalesisehlakalo ngoba siliphutha elincinyane nje eselilungisiwe.
NgoLwesibili, umongameli Mugabe ufunde umbiko owawubala kumaviki amabili edluleyo, ngesikhathi amalunga ebandla eliphisikayo eleMDC-T esithi emukele incwadi ngomakhalekhukhwini ibethusela njalo ibaxwayisa ukuthi bengachothozi umongameli Robert Mugabe nxa esethula umbiko wakhe ephalamende.
Kusenjalo, isikhulumeli seMDC-T uMnu. Obert Gutu utshele intathelizindaba ngoLwesithathu eHarare ukuthi ibandla lakhe litshele isikhulumi sedale lephalamende uMnu. Jacob Mudenda ukuthi ahlolisise udaba lokwethuselwa kwamalunga e-MDC-T, kodwa wedlulisela loludaba kukhomithi ye Standing Rules and Orders ephalamende.
UMnu. Abednico Bhebhe, ongumqoqi wenhlelo zeMDC-T usole kakhulu okwenzakale edale lephalamende lephalamende esithi inkokheli yeZanu PF kumele ixolise hatshi edale leli kuphela kodwa lakuzulu wonke weZimbabwe.
