Namuhla kunanzwa usuku lokuzalwa kuka Mfundisi Martin Luther King Junior ngesikhathi kuxokozela kwele Melika abakubandla lama Republicans befuna ukuvimba ukuba amansundu bevote.
UMfundisi King Junior walwela njalo ukuba kungabi lobandlululo kwele Melika lapho abansundu ababegqilazwa ngabamhlophe.
Ibandla lama Democracts lithi abakubandla lama Republicans kukhanya befuna ukuvimba ukuvota kwabantu abansundu njalo bamemethekisa ukubandlululwa kwabantu laba.
Lokhu kwabaselwa yikungena kowayengumongameli, uMnu. Donald Trump, esikhundleni sikamongameli. Abantu abanengi bathi uTrump nguye owenza ibandla lama Republicans likhuthaze ukuvimba abansundu kwezokhetho njalo lokubandlululwa kwabansundu.
UTrump labanye bakhe babefuna kulahlwe amavoti abantu abansundu ngesikhathi sokhetho olwenziwa ngomnyaka ka2020.
Kodwa ibandla lama Democrats lokhu lilwisana lokuthi kubelemithetho evumela abantu bonke kwele Melika ukuba bevote.
UMnu. Busani Mbuso Ntini, odabuka eZimbabwe ohlala kwele Melika, uthi luqakathekile usuku lolu eMelika lakwamanye amazwe.
