Izizalwane zeZimbabwe ezikweleSouth Africa zithi sezithwele amagabha avuzayo ngo Operation Fiela, kusitsho ukuthi Thanyela, lapho abangenelwa khona ezindlini, ezimoteni kanye lemisebenzini ngamapholisa lamasotsha kudingwa izigangi labaselizweni ngokungekho emthethweni. Abanengike abaselizweni ngokungekho emthethweni bathi sebesesaba ngitsho lokulala ezindlini kumbe ukuhamba ezitaladeni.
Kusukela kuqale uhlelo lwe Operation Thanyela emavikini ambalwa adluleyo, sekubotshwe abakwamanye amazwe abaselizweni ngokungekho emthethweni abedlula amakhulu ayisikhombisa (745) inengi labo kungabeZimbabwe.
Phansi kwaloluhlelo, amapholisa, amasotsha kanye labogatsha olubona ngokungena kwabantu elizweni, bangena ezindlini, emisebenzini, lezitaladeni kuzingelwa izigangi labaselizweni ngokungekho emthethweni.
Njengoba inengi labeZimbabwe bengelamaphepha abapha imvumo yokuhlala kweleSouth Africa , bathi sebehamba bephethe amathumbu ngezandla kwazise lebusuku kabasabuquthi besesaba ukubotshwa baphindiselwe ekhaya.
Isizalwane seZimbabwe unkosazana Nomusa Khumalo, uthi amapholisa lalabo abangelamaphepha okuba selizweni sebephila okukamangoye legundwane emini lebusuku.
Esinye isizalwane seZimbabwe umnumnzana Mcasiseli Gwazagwaza uthi okubuhlungu yikuthi uOperation Thanyela ukuhlasela loba ulele lobuhamba, sekuze kungesela ndawo yokucatsha.
Kodwake abanye abeZimbabwe abafana lonkosazana Thabisile Mahlangu bathi phambili ngohlelo lweOperation Thanyela.
Intathelizindaba yeZimbabwe umnumnzana Mxolisi Ncube uthi lesi senzo sikhombisa sobala ukuthi uhulumende uvumelana lezizalwane zakuleli ukuthi abakwamanye amazwe yibo abayizigangi kweleSouth Africa.
Kusenjalo umphathintambo wogatsha lwendaba zasekhaya umnumnzana Malusi Gigaba, utshaya phansi ngentonga esithi ngeke kusaphinde kube lula ukungena lokuhlala kweleSouth Africa ngokungekho emthethweni.
UNcube uthi kuyacaca ukuthi sekuyisikhathi sokuthi izizalwane zeZimbabwe zisukume zilungise okuhluphayo ezweni lazo, ukuze ziyephila impilo yobuntu hatshile eyokuzingelwa sengathi zinyamazana.
Ugatsha lwendaba zasekhaya lubikele idale lephalamende ukuthi ebantwini bonke abangena elizweni kulezi insuku befuna incwadi zokuphephela izizalwane zeZimbabwe yizo ezilenani eliphezulu.
AbeZimbabwe ke bona bathi njengoba kusobala ukuthi ekhaya akuhlaleki, kweleSouth Africa abasafuneki, sebezabona ngakho lapho okuzawela khona induku loxakuxaku.