Ziyakhala izakhamizi ezilondoloza izihlobo ezilomkhuhlane wengqondo, ikakhulu labo abathatha izidakamizwa.
Inhlanganiso ezibona ngezempilakahle lazo zithi seliqonge kakhulu inani labangaphilanga engqondweni abacina bezibulala.
Omunye wabagcine indodana eleminyaka yokuzalwa engamatshumi amane elomkhuhlane wengqondo nguMnumzana Paul Siangapi, ohlala eVictoria Falls.
Indodana yakhe le etshaye isihlobo imiswe emthethwandaba ngoMvulo wagwetshwa ukuba ayelaliswa eMlondolozi Psychiatric Institute.
USiangapi olandisele iStudio 7 udaba lolu ewohloka inyembezi uthi sebemazi emthethwandaba ngodaba lwendodana yakhe ngoba bebehlala bembophisa ngodlame lwakhe.
“Uhlala engithembisa ukungibulala, ethi ngabulala unina, kutsho uSiangapi.
“Mihla yonke, endlini kangivumeli ukungibona uyathatha ihloka efuna ukungibulala, ekhitshini lakho kavumi ukuba ngingene. Sengitshona ngihlezi ezitolo ngisesaba ukuba engangibulala, akukubonisise, umntwana owamzalayo ehlala ekuthembisa ukukubulala.”
Ngemva kokugwetshwa kwendodana yakhe, sixoxe loNkosikazi Nomqhele Sibanda, omangalele ogulayo lo, engumzawakhe.
“Waqala wangitshaya ngempama, wasengitshaya nge broom eqolo, wathatha ihloka, bamthathela wasethatha ingqamu ezama ukungigwaza entanyeni ukhulu wambamba.”kuchasisa uSibanda.
Umantshi uMnumzana Gift Manyika ohola inkundla yomthethwandaba ye Victoria Falls ngelanga leli wathi kumele kuvalelwe eMlondolozi Psychiatric Institute abanye njalo ababili abagula ingqondo.
UMnumzana Bhekumuzi Sikhosana, owake waba kusimo esifanayo njalo osewabuyela ezifundweni zakhe zekolitshi yemfundo yaphezulu, uthi izidakamizwa waqala ukuzithatha koBulawayo ngenxa yokuhlukuluzwa.
“Ekudingeni umsebenzi ngahlangana le team eyangifundisa ama drugs afana lamagabha ebroncho, benylin le codeine.”watsho echazela abafundi, ebakhuthaza njalo ngokwenqabela lokhu.
Ujaha lo, wahlengwa ngabanye ezama ukuzibulala.
UDokotela Fungai Musinami, ohola isabelo seHwange ngaphansi kohlangothi lukahulumende olwezempilakahle, uthi bakhathazekile ngezinga abantu abagula ngayo ingqondo, okuphetha ngokuzibulala.
“Kunzima esihlangana lakho singabezempilakahle. Abantu beyagula inngqondo kakhulu elizweni lokhe, njalo labanye bayazibulala kakhulu, ikakhulu abasilisa. Sicela abezokholo basixhase ekulwiseni loluhlupho, kodwa sesizama ukuphuma lendlela zokuba lezindlu zokukhangela laba ngoba ezikhona ziya zingeneli.”
Sicele njalo uNkosikazi Rufaro Nyakwende owenhlangiso ye Zimbabwe Civil Liberties and Drug Network ukuba asichazela imbangela yohlupho lolu.
Uthi abaphazamisekayo yizifundiswa ezingelamsebenzi, kanye lezintandane ezikhokhela imizi.
“Abantu abanengi bazithola sebegula ingqondo ngesizatho sokuthatha okudakayo, ikakhulu intsha. Kuphenyo lwethu sathola ukuba abanengi bayazibulala ngemva kokungena ku depression abanye njalo bayazidaka ngesimo sobukhuni bomnotho, ukweswela usekelo ezimuluni,impilo nje kanye lokunye njalo lokhu sekubangela ukuba sithole imbiko ephezulu yabantu abazibulalayo kumbe bebulala.”
Kuviki eliphelileyo, owesilisa eBinga ugangade umkakhe ngelitshe wambulala, qede wazilengisa. ELupane kulomama obulele usane lwakhe ngelitshe watshona, wasemlalisa engutsheni enganaki lutho. Umama lo uvalelwe eRemand Prison lapho amelele ukuyahlolwa ingqondo esibhedlela.
Inhlanganiso yamazwe omhlaba eye World Health Organisation, bemanyane lohulumende weZimbabwe, kuphenyo lomnyak’odluleyo, baveza ukukhathazeka labo ngezinga lokufa lokuzibulala kwabantu elizweni leli okugoqela abafundi. Uphenyo lolu lwaveza ukuba abantu abayisilinganiso sokufika phose okubili ekhulwini - 1.8% bafa ngokuzibulala.
Impumela le iveza ukuba ilizwe leli lidinga imali edlula izigidi ezingamakhulu amahlanu zamadollar eMelika – US$518 million, eyokulwisana lenhlupho zomkhuhlane wengqondo.
Forum