Idale leZanu PF Central Committee likhangelelwe ukuhlangana ngoLwesihlanu lihlaziya inguquko kusisekelo salelibandla enika uMongameli Mugabe amandla okukhetha abasekeli bakhe ababili kanye lomgcinisihlalo webandla.
Inguquko le ilethwe ngamalunga ecele elikhokhelwa nguMnu Emmersn Mnangagwa yena obikwa elwisana lecele elikhokhelwa nguNkosikazi Joyce Mujuru njalo yavunywa lidale lePolitburo izolo.
Ukuguqulwa kwesisekelo lesi kutsho ukuthi amandla wonke asefakwe kuMugabe. Esikhathini esedluleyo abasekeli bakhe lomgcinisihlalo webandla leli bebekhethwa ngamalunga elelibandla emhlanganweni weCongress.
Inengi lithi lokhu kuveza sobala ukuthi ibandla leZanu PF libandla labontandokayiphikiswa elingananzi intando kazulu.
Sixhume ingcwethi kwezombusazwe uMnu Brilliant Mhlanga sambuza ukuthi ukuguqulwa kwesisekelo seZanu PF lokhu kutshoni kuZanu PF lakulizwe leZimbabwe.
