Iqembu labesilisa elimela i-Zimbabwe emdlalweni kakhilikithi liphakame ngoMvulo lilubhekise kwele Pakistan, ukuyadlala imidlalo eyohlobo lwe One Day International kanye leyohlobo lwe Twenty20.
Ngokwakuqala ukuba iqembu leZimbabwe elaziwa ngegama elithi Chevrons lidibane lelinye iqembu elimela elinye ilizwe selokhu ezemidlalo zaphazamiswa ngumkhuhlane we Covid 19, ekuqaliseni kwalumnyaka.
Ukaputeni weqembu le Zimbabwe uChamu Chibhabha, uthi bona njengeqembu bazimisele ukunqoba kulimidlalo abazayidlala leqembu le Pakistan.
“Kuyinto enhle ukuthola ithuba leli ngoba sasesicabanga ukuba mhlawumbe lonyaka asisoze senelise ukudlala lamanye amazwe. Ensukwini ezilandelayo sizaqala ukudlala njalo ngikhangelele ukuba sidlale kuhle siphakamise igama lelizwe lakithi ngoba lithuba elikhulu kabi okumele silisebenzise leli,” kutsho uChibhabha.
Iqembu le Zimbabwe lizadlala imidlalo emithathu eyohlobo lwe One Day International njalo umdlalo wakuqala uzadlalwa mhla zingamatshumi amathathu kuyonale inyanga ka Mfumfu. Umdlalo wesibili uzadlalwa ngosuku lwakuqala olwenyanga kaLwezi kusithi owesithathu njalo ungowokucina owohlobo lwe ODI uzadlalwa mhla zintathu kunyanga kaLwezi.
Imidlalo eyohlobo lwe Twenty20 izaqala mhla ziyisikhombisa insuku kunyanga kaLwezi lapho okuzadlalwa khona umdlalo wakuqala. Umdlalo wesibili owohlobo le T20 uzakuba khona mhla ziyithoba minwe mbili insuku kunyanga kaLwezi kusithi owesithathu njalo ungowokucina uzadlalwa mhla zilitshumi kunyanga kaLwezi.
UChibhabha uthi uyabathemba abadlali ababumba iqembu le Zimbabwe ukuba bazawufeza umsebenzi abawulande ePakistan.
“Ngokubona kwami sileqembu eliqinileyo elibunjwa ngabadlali abalesikhathi eside bedlala umdlalo kakhilikithi kanye labasakhulayo. Isifiso sami ngesokuthi abasakhulayo bakholise ukudlala kuthi asebelesikhathi kube yibo abathungamelayo ukuze laba abancane bafunde kubo,” kutsho uChibhabha.
Kumidlalo edlalwe kusigaba se National Premier League ngempelaviki edluleyo iqembu le Amakhosi linqotshwe ngama wickets amane liqembu le MidWest emdlalweni oqhutshelwe enkundleni ye Queens Sports Club ko Bulawayo.
Iqembu le Takashinga Patriots linqobe ele Great Zimbabwe Patriots ngama wickets ayithoba minwe mbili emdlalweni oqhutshelwe enkundleni ye Masvingo Sports Club kuthi ele Gladiators linqobe ele Easterns ngama runs alitshumi lathoba munwe munye enkundleni ye Mutare Sports Club ikanti iqembu le Rainbow Sharks linqobe ele Queens Sports Club ngama runs angamatshumi amathathu lesikhombisa enkundleni ye Kwekwe Sports Club.
