Uhlelo lokubhalisa amagama abantu abazavota kukhetho lomnyaka ozayo luqhubekele phambili endaweni ezitshiyeneyo ngoLwesithathu ingxaki ezitshiyeneyo lazo zisiya phambili.
Iziphathamandla zekomishini yezokhetho iZimbabwe Electoral Commission (ZEC) zibikwa zithatha isikhathi eside ukubhalisa umuntu oyedwa.
Lokhu sokubangele ukuthi abantu abanengi bengayibhalisa kuthi abanye ngabaphenduka bengabhalisanga.
KoBulawayo khona babikwa bebebalutshwana kakhulu ekade bebhalisa ngoLwesithathu.
UMnu. David Coltart, owake waba nguSenator njalo olilunga leMDC ekhokhelwa nguMnu. Welshman Ncube, uveze ukuthi udlule endaweni ebhalisela khona uzulu kodwa wathola kungelabantu.
Eloba enkundleni yeFacebook, uColtart uveze ukukhathazeka okukhulu esithi ngokungazinikeli kuhlelo lokubhalisela ukuvota, uzulu weZimbabwe uzigwaza ngowakhe.
Isikhulumeli senhlanganiso yeChristian Alliance, uMnu. Useni Sibanda, utshele iStudio 7 ukuthi kuqakathekile ukuthi uzulu athathele uhlelo lolu phezulu.
Lokhu sikudaba lunye, ukusungulwa kohlelo lokuvota lokuloba amagama abavoti kusetshenziswa imitshina yakule'izinsuku, yonale eye biometric voting, kucatshangelwa ukuthi kuyehlisa amathuba okuqilibezela kukhetho.
Kodwa lokhu kutshiye inengi lomhlaba jikelele lingaselathemba lemitshina le ngemva kokuba umthethwandaba wakwele Kenya umise impumela yokhetho lwalelolizwe ngoba kwaba lobufakazi bokuthi imitshina ye-biometric voting yasetshenziswa ukuqilibezela.
Ukuhlaziya udaba lokuthi imitshina le kayisoze idale inkulumo kukhetho lweZimbabwe olomnyaka ozayo, uChris Gande we Studio 7 uxoxe lokhomishina Qhubani Moyo wogatsha lwezokhetho, lwe ZEC.