Iqembu le Zimbabwe linqotshwe nge 1 ka nya liqembu le Botswana emdlalweni wokucina owesibaya sika Group C okuyimpumela etsho ukuba iqembu le Botswana yilo eselithole ilungelo elokudlulela kusigaba esilandelayo esomncintiswano.
Ama Mighty Warriors anqotshwe ngempumela efanayo emdlalweni wawo wakuqala kumncintiswano walonyaka lapho adliwe khona 1 ka nya liqembu le Tanzania.
Ekhuluma ngemva komdlalo wabo le Tanzania umqeqetshi weqembu lama Mighty Warriors uSithethelelwe Sibanda uthe yena limpumela iyisibonelo esokuba kabalungiselelanga ngemfanelo ukuyaphatheka kumidlalo ye COSAFA ngenxa yomkhuhlane we Covid – 19.
“Kuthe laloba sekusaziwa ukuba sizaphatheka kulumncintiswano kube nzima ukuba siqale amalungiselelo ngenxa ye lockdown. Lokhu kudale ukuba siphuze ukuqala ukuzilolonga silungiselela ukuzodlala kulumncintiswano.
Ngibatshayela ihlombe abadlali bami ngendlela abazame ngamandla abo wonke kodwa okusalayo kumele umdlali abe esimeni esilungileyo emzimbeni ukuze adlale kuhle,” kutsho uNkosazana Sibanda.
Intathelizindaba yezemidlalo uWashington Sibanda uthi yena kusiya ngaye aluba vele ilizwe le Zimbabwe kalihambisanga qembu ukuyaphatheka kumncintiswano we COSAFA walonyaka.
“Umncintiswano we COSAFA walonyaka ubuye ngesikhathi esinxele kakhulu kithi njengelizwe le Zimbabwe ngenxa yobhubhane lwe Covid – 19 oludale ukuthi kuvalwe ukubuthana kusukela ngenyanga kaMbimbitho.
Mina ngokubona kwami bekungaba ngcono ngabe sicelile ukuba siphunyuzwe kumncintiswano walonyaka singabi leqembu elisimelayo ngoba besingazilungeselelanga ngemfanelo,” kutsho uSibanda.
Impumela yemidlalo edlalwe liqembu le Mighty Warriors ingabe ingathokozisi kodwa umqeqetshi uSibanda uthi umlandu abawuphiwe yinhlanganiso ekhokhela ezomdlalo wenguqu kwele Zimbabwe eye Zimbabwe Football Association, iZifa, yikuba balungiselele ikusasa yeqembu.
“Okunye kuya ngokuthi inhloso yenhlanganiso ekhokhela ezomdlalo wenguqu yikuyini kulumncintiswano ngoba kwesinye isikhathi sidlala silandela ukuba kuyini okuhloswe yinkokheli yezomdlalo elizweni.
Lapha siphiwe umlandu wokuba sihlanganise abasakhulayo labalesikhathi eside bedlala kuqembu lesizwe,” kutsho uNkosazana Sibanda.
Umncintiswano we COSAFA Senior Women’s Championship uqhutshwa kanye kanye lomncintiswano wamankazana aleminyaka engaphansi kwetshumi lesikhombisa njalo iqembu le Zimbabwe linqotshwe nge 7 ka nya emdlalweni walo wakuqala ngoLwesihlanu kwathi ngeSonto linqobe ele Comoros nge 3 ka 2.
