Inhloko kahulumende we Lesotho uMnu. Thomas Thabane awabalekela kwele South Africa ngempelaviki esithi ibutho lelizwe lakhe lifuna ukumthathela umbuso ngodlakela ubekhangelelwe ukubuyela kwele Lesotho lamuhla ngemva kokucutshungulwa kwaloludaba ngumanyano weSADC kodwa isikhulumi sakhe sithi lokhu akusoze kwenzakale ngoba kungakabi lokuhlaliseka okupheleleyo kulelolizwe.
UMnu. Samonyane Ntsekele utshele umsakazo weAFP lamuhla ntambama ukuthi uMnu. Thabane ulokhu eseJohannesburg kweleSouth Africa.
Umanyano weSADC usuthembise ukuthi uzathumela umlamlankunzi kanye lelinye iqula kwele Lesotho ukuyakhulumisana leziphathamandla zalelolizwe ezigoqela umsekeli kaMnu. Thabane, uMnu. Mothetjoa Metsing okhokhela ibandla le Congress for Democracy, lona elikuhulumende womanyano lelikaMnu. Thabane eleAll Basotho Convention.
Ibutho leLesotho lona liyakulandula ukuthi selithethe umbuso ngodlakela lisithi belithathela amapholisa izikhali ngoba efuna ukuncedisa abakade beqoqa ukutshengisela esigodlweni salelolizwe iMaseru, njalo isikhulumi sebutho uMnu. Ntlele Ntoi ukugcizelele lokhu kungxoxo leStudio 7.
Amapholisa abikwa esekela uMnu. Thabane, ibutho lisekela uMnu. Metsing.
Umgcinisihlalo womanyano weSADC umongameli Robert Mugabe ubethumele iziphathamandla zikahulumende weZimbabwe kwele South Africa ukuthi lazo zidingisise ngaloludaba.
EleLesotho selake labhekana lohlupho olufanayo kusukela lithola uzibuse kweleBhilithane ngomnyaka ka1966.
Ukuhlaziya loludaba, uSithandekile Mhlanga weStudio 7 uxoxe loMnu. Zenzo Nkomo, ingcwethi ecubungula ezombusazwe, yena ogcizelela ukuthi umanyano weSADC kufanele usebenze gadalala ukuxazulula loludaba.
