Iziphathamandla zikahulumende weZimbabwe lezeZanu PF zithi ukwesulwa kwezinye izijeziso ebezetheswe amalunga ebandla elibusayo yiMelika kuveza sobala ukuthi uhlelo lukaMongameli Emmerson Mnangagwa olokuvuselela ubudlelwano lamanye amazwe luyaphumelela.
Kodwa abanye abacubungula ezombusazwe bathi iziphathamandla lezi zikhanya zingakunanzeleli ukuthi izijeziso ezintsha ezetheswe uMnangagwa labanye bakhe kuZanu PF nguMongameli Joe Biden weMelika zingaba zilukhuni kakhulu kalalezo esezikhitshiwe.
UBiden wazise ngoMvulo ukuthi usesule zonke izijeziso ezazetheswe amalunga eZanu PF lamankampani amanengi yiMelika kusukela ngomnyaka ka2003.
Kodwa uphinde wethesa uMnangagwa labanye bakhe abalitshumi izijeziso ezintsha phansi kohlelo lweGlobal Magnitsky Program, ngoba esithi uMnangagwa ulokhe esephula amalungelo oluntu futhi ephatheka emisebenzini yenkohlakalo efana lokuhuquluza inotho yeZimbabwe egoqela igolide ledayimana.
“I-Melika isakhathazeke kakhulu ngokuhlehla kombuso okhululekileyo, ukwephulwa kwamalungelo abantu, kanye lenkohlakalo kuhulumende weZimbabwe,” kuchasise umsekeli kanobhala wogatsha lweMelika olubona ngezezimali olweTreasury uMnu Wally Adeyemo.
“Inguquko esiyenzayo namuhla iveze obala iqiniso ezihlala silitsho elokuthi izijeziso zethu aziqondananga labantu beZimbabwe makhaka kodwa lujonge abantu abathile.”
UMnangagwa uba nguMongameli wakuqala emhlabeni jikelele ukujeziswa yiMelika phansi kohlelo lweMagnitsky Program, okuluhlelo olwasungulwa yiMelika ngenjongo yokujezisa abephula amalugelo oluntu kweleRussia.
Abanye abetheswe izijeziso ezintsha loMnangagwa bagoqela umkakhe, uAuxillia, umsekeli kaMnangagwa uMnu Constantino Chiwenga lomkakhe, usomabhizimusi uMnu Kudakwashe Tagwirei lomkakhe kanye lamankampani amathathu akaTagwirei labangane bakhe agoqela eyeFossil Agro leyeFossil Contracting.
Ngakolunye uhlangothi, umthetho ojezisa iZimbabwe ngokuyenqabela ukuthi ithole usizo lwemali kumabhanga amakhulu omhlaba, oweZimbabwe Democracy and Economic Recovery Act (ZEDERA), owapasiswa yiPhalamende yeMelika ngomnyaka ka2001 ulokhe ukhona.
Le kukhanya kuyinto engananzelelwanga yisikhulumeli sikahulumende weZimbabwe uMnu Nick Mangwana, yena ogijimele enkundleni yeX ngemva kwesimemezelo sikaBiden, waloba ukuthi ukwesulwa kwezinye izijeziso yiMelika kuveza ikuthi uMnangagwa uyaphumelela kuhlelo lwakhe lokuvuselela ubudlelwano lamanye amazwe.
UMangwana uqhubeke wathi izijeziso ezintsha kumele zesulwe, okungamazwi ethulwe njalo yisikhulumeli seZanu PF uMnu Farai Marapira. Ilunga leZanu PF uMnu Believe Gaule laye ulembono efanayo.
“Kulokhe kufanana, ama-sanctions alokhe ekhona. Nxa ama-sanctions kuthiwa ethulela uMongameli, kutsho ukuthi athulelwa ilizwe ngoba uMongameli ukhokhela ilizwe,” kutsho uMnu Gaule ekhuluma leStudio 7.
UGaule uqhubeke esithi eleMelika yilo elephula amalungelo oluntu endaweni ezinengi, okugoqela eGaza, hatshi uMnangagwa.
Udaba lwezijeziso lolu lwehlukanisa abantu ngemibono, abanye besithi kumele zesulwe kodwa abanye besithi kumele ziqhubeke zikhona ngoba iZanu PF ilokhe isephula amalungelo kazulu.
Ilunga leCCC uMnu Swithern Chiroodza uthi lanxa labo befuna izijeziso zesulwe, izenzo zeZanu PF zenza lokhu kubenzima.
Uthe: “Ama-sanctions abakhona kusukela ngo2001 njalo lokhe sikhangelele ukuthi kwesinye isikhathi angenza ukuthi abantu beZanu PF bekhothamise amakhanda babe lenhloni ngalokhu abakwenzayo bebhidliza inotho yeZimbabwe.”
Okhokhela inhlanganiso elwela amalungelo oluntu eyeIbhetshu Likazulu uMnu Mbuso Fuzwayo yena utshele iStudio 7 ukuthi ukwesulwa kwezinye izijeziso yinto enhle, kodwa uthi ibandla leZanu PF liguqula izenzo zalo.
Isikhulumeli sogatsha lweMelika olubona ngobudlelano balelilizwe lamanye amazwe olweU.S. State Department uMnu Metthew Miller uchasise ukuba besule izijeziso ezindala basungula ezintsha ngoba kuluhlu oludala bekulabantu abanengi asebabhubhayo kanti labanye abasengamalunga kahulumende weZanu PF.
USenator weMelika uMnu Jim Risch yena wethule umbiko umbiko enkundleni yeX esithi lanxa esamukela okwenziwe nguBiden, ufuna uhulumende weMelika aqinise umthetho weZEDERA ukuze ajezise iziphathamandla zeZimbabwe kalukhuni ngoba zilokhe zisephula amalungelo kazulu.
Forum