Ngesikhathi umkhuhlane weCOVID 19 ulokhe umemetheka elizweni lemhlabeni jikelele, inengi labantu libikwa lilokhe liphithizela emadolobheni kanye lemalokitshini, lingalandeli iziqondiso ze lockdown, ezokwenqabela ukumemetheka kweCoronavirus.
ingcwethi kwezempilakahle zigcizelela ukuthi abantu beqhubeke belandela iziqondiso zokwenqabela iCoronavirus, ezibalisa ukuvala ubuso ngama masks, ukugeza izandla kumbe ukuzigcoba ngamafutha e sanitiser sikhathi sonke, lokungasondelelani.
Kodwa inengi labantu lithi kufanele liziphandele kulokuhlala ezindlini kungelakudla kanye lamanzi okusebenzisa.
UMnu. Thembelani Dube, isiphathamandla senhlanganiso yeBulawayo Progressive Residents Association, uthi bakhuthaza izakhamizi ukuthi zilandele lezi iziqondiso.
Ingcwethi kwezempilakahle zithi lanxa uhulumende esithi uselethe omongi labongikazi ezibhedlela ezinhlanu elizweni ukulwisana lomkhuhlane weCOVID 19, kunengi okufanele kwenziwe ngoba abeneli njalo impahla zokusebenzisa ziyasilela.
Izibhedlela lezi zibalisa ese Parirenyatwa, Wilkins, United Bulawayo Hospitals, leseThrongrove koBulawayo.
Okunengi ngokwenzakala ezibhedlela asikuzweni kungxoxo esiyiqhube loDokotela Rogers Magigo, ingcwethi kwezempilakahle.