Abenhlanganiso elwela amalungelo oluntu eyeIbhetshu LikaZulu bamanyane lenkokheli zomdabu, amabandla ezombusazwe, abezinkonzo, inhlanganiso ezizimeleyo lozulu wemangweni oweBhalagwe esabelweni seMatabeleland South, ukwakha ilitshe lesine lesikhumbuzo sabantu ababulawa ngesikhathi sombhuqazwe weGukurahundi.
Abe Ibhetshu Likazulu bahle bathatha ithuba leli lokuphatha umthandazo wesikhumbuzo sabantu abagongodwa yiFifth Brigade, eyalilolongwa kwele North Korea.
Minyaka yonke Mhlaka 21 Nhlolanja kuba lombuthano wokunanza abantu ababulawa ngesikhathi sombhuqazwe weGukurahundi oqoqwa ngabe Ibhetshu LikaZulu.
Ngolwesithathu kusungulwe umsebenzi wokwakha ilitshe lesine lokulungisisa elinye elabhidlizwa ngabacatshangelwa ukuba badlelana lohulumende weZanu PF, duzane lalapho okwabulawa kwagqitshelwa abantu abanengi eBhalagwe.
Unobhala jikelele weIbhetshu LikaZulu uMnu. Mbuso Fuzwayo, chasisa inhloso yokwakha amatshe lawa aweBhalagwe.
"Siyakhe ithuna safaka phezukwalo umbhalo leziphambano ezinhlanu ezimele abantu ababulawayo, abanyamalalayo, abadlwengulwayo abatshiselwa imizi labatshaywayo njalo asisuthiseki ngendlela uhulumende aphatha ngayo udaba lombhuqazwe weGukurahundi."
Evula okusemthethweni ilitshe eBhalagwe iNduna uMagwegwe Fuyane ubonge abeIbhetshu LikaZulu ngokuzobakhumbula esithi inengi labanye abalele eBhalagwe ngabasuka endaweni ezikude.
"Umsebenzi walamuhla uphethwe zinkokheli zomdaba ezisuka endaweni ezehlukeneyo abamabandla okholo lombangazwe ngoba abantu abalele lapha basuka endaweni ezehlukeneyo babulawa baxojikelwa lapha njalo sibonga lbhetshu likaZulu ngomsebenzi omuhle kangaka."
Umkhokheli webandla leZapu uMnu. Sibangilizwe Nkomo obesembuthanweni lo, ubike ngensolo abalayo njengebandla ngokuphathwa kodaba lweGukurahundi.
"lndlela uhulumende aphatha ngayo loluhlelo lokukhumisana umlotha ngombhuqazwe weGukurahundi inxele ngoba ibandla leZapu labantu beZapu kabaphatheki kuloluhlelo njalo umbulali nguye osekhonyela udaba lolu ngapha loCharumbira ukhuluma eklamasa."
Ilunga ledale lephalamende uSenator Nonhlanhla Mlotshwa uthi abadlula kikho kusasebuhlungu emdenini wabo, labo bakhangelele ukwakha ilitshe lesikhumbuzo sezihlobo ezanyamalaliswa kulumbhuqazwe weGukurahundi.
"Ngibuhlungu njalo angisoze ngizigeze ubuNdebele bami njalo imuli yangakithi ilabantu abanyamalalalayo labo sizabakhela ithuna njengesikhumbuzo ngoba loGogo wami waze wathula engazi ukuthi umntanake wayangaphi njalo ulelephi."
lsakhamuzi seBhalagwe uNkosikazi Sithembiso Dlamini uthi kubuhlungu ukuphila duze lengcwaba labantu abanengi abangaziwayo.
"Ngidabuka eNkayi kodwa ngakhele lapha eBhalagwe, silomalume wethu abamthatha ngesikhathi seGukurahundi lamanje asikwazi lapho alele khona sikhalela ngaphakathi."
Akwaziwa ukuba uhulumende uzaluphatha njani udaba lwelitshe leli elakhiwa eBhalagwe.
I-Studio 7 yehlulekile ukuxhumana loMnu. Nick Mangwana umabhalane omkhulu obona ngokwethulwa kwemibiko kuhulumende kanye loMnu. George Charamba, isikhulumeli sika Mongameli Emmerson Mnangagwa ngoba bebengadobhi omakhalekhukhwini.
Omela iPelandaba Tshabalala, edale lephalamende, uMnu Joseph Tshuma , engowebandla leZanu PF, uncome okwenziwe yinhlanganiso yeIbhetshu Likazulu eBhalagwe Ngolwesithathu.
"Akulaphutha elenziwe yinhlanganiso yeIbhetshu LikaZulu eBhalagwe Concentration Camp ngoba vele kufanele bakwenze njalo bakwenze kuhle."
UMnangagwa, okuthiwa waphatheka kumbhuqazwe weGukurahundi, usanda kukhulumisana lezinduna ngohlelo oluzaqhutshwa ebantwini lapho okuzabuzwa ngokwabehlela ngesikhathi seGukurahundi. Abantu abanengi bayasola ukuthi uhlelo lolu lungaqhutshwa ngendlela engasuthisa abathitnekayo.
I-Five Brigade yabulala abantu abafika inkulungwane ezingamatshumi amabili – 20,000 eMatabeleland leMidlands kusukela ngomnyaka ka1982 kusiyafika umnyaka ka1985.
Forum