Amapholisa asexwayise uzulu ukuthi namahla imigqaqo egqagqele idale le Constitutional Court eHarare izakuba ivaliwe. Khona phakathi kwalumthethwandaba akusoze kuvunyelwe amafoni leminye nje imitshina engathatha imfanekiso.
Umsakazo weZBC yiwo kuphela ophiwe imvumo yokusakaza okuzaba kusenzakala.
Ngalokho kulabanye abazaba bebuthene endaweni ezitshiyeyeneyo bebukela okuzakuba kusenzakala kumabonakude. KoBulawayo ibandla leZanu PF linxuse amalunga alo ukuthi azobukela esigodlweni sebandla iDavies Hall.
Amagqwetha avela eSouth Africa amela umkhokheli weMDC Alliance, uMnu. Nelson Chamisa, asephiwe incwadi zokusebenza elizweni.
Osekusele yikuthi sizwe ukuthi kuzahamba njani.
Loba nje umthethwandaba waphezulu elizweni oweConstitutional Court ukhangelelwe ukuphuma lesinqumo sokuthi ngubani onqobileyo kukhetho lokudinga umongameli welizwe, lizahlala kusasa inengi lezakhamizi e Zansi yemaNdebeleni lisemnyameni ngalokho okwenzakalayo e Harare.
Inengi lezakhamizi zemaphandleni awezansi yeMandebeleni lithi ukuswelakala kwamagagasi emisakazo, omakhalelekhukhwini kanye lamagetsi emaphandleni ngezinye zezizatho ezenza ukuthi bahlale bengazi lutho ngalokhu okwenzakala elizweni.
Loba nje umthethwandaba weConstitutional Court ukhangelele ukuhlala ngoLwesithathu ukuze uxazulule udaba lwempumela yokhetho lokudinga umongameli welizwe uzulu emaphandleni uthi kalalwazi olunengi ngaloludaba.
UNkosazana Sibonile Gumbi okaWard 17 eFumukwe okholwa ukuthi uMongameli Emmerson Mnangagwa wanqoba kungela kuthandabuza uthi basizwa yiwonalo umsakazo ukuzwa indaba kodwa inengi livele alikwazi ukuthi kwenzakalani.
Kutsho uGumbi: “IKakhulu kubamba iStudio 7, ngitsho kuze kube lakathesi asikwa, siza kulindele ukuze sibe kwazi ukuthi kuyini okuthatha indawo njalo nxa sisizwa kukhulunywa ngokuthi ama results abanye abe manengi isifiso sethu yikuthi akubuyelwe back sakhangela from each constituency ukuthi lo uphume lengaki kuze kuyefika phezulu engxenye yikho okungalamula nxa kulama arguments.
Esinye isakhamuzi seFumukwe uNkosazana Preety Nyathi uthi kuyadingeka ukuthi uhulumende athuthukise amagagasi emsakazo ukuze labo behlale bekwazi okwenzakala elizweni.
“Kakhulu besifuna nga kuyathuthukiswa amagagasi yonala ukuthi vele nxa uleradio yakho ungakhathazeki uphonguvula lawe uzilalele lapho okhona hayikhona ukuthi uqale uphume uye kweyinye indawo ocabangela ukuthi lapha yikho okungcono lami ngizakuzwa akukwenzi uhlale information ulayo upto date ukuthi ngakwenzakala ukuthi afinyelele indawo yonke amagagasi yikho esikufisayo,” kutsho uNyathi.
UMqondisi womsakazo wesigaba oweNtepe Community Radio uMnu. Mvelo Zondo uthi kubalulekile ukuthi uhulumende aphange aphe lumsakazo imvumo yokusakaza ukuze izakhamizi zihlale zilolwazi.
“Ngumsakazo okhangelelwe ukuthi uncedise kakhulu lapho okungafinyeleli khona umsakazo wesizwe esiwaziwo sonke ZBC radio station okwakathesi isebenza iyi initiative uhulumende kakavuli amagagasi ukuthi anike amacommunity radio station amalicense elizweni lonke kathesi angu 31 amacommunity amelele amalicense,” kutsho uZondo.
Kusenjalo inengi labantu likhala ngokuthi intengo yempahla iya iqonga ezitolo ngesikhathi abezombusazwe belwisana emthethwandaba.
UNkosazana Sithabile Mbangeni owe Wenlock uthi lokhu akumjabulisi.
“Angikaboni lutho engilubonayo, kakhulu emalini imali lokhu ngingayiboni ukuthi kanti ihamba njani ngoba lokhu ingani icatshile njengakuqala ngingakavoti.Yikho lezitolo kunjalo ngingela mali ezitolo sokuqansa izinto zonke akulalutho olubambekayo lokhu kungani kuyangidanisa sibili ukuthi kanti sizaphetha umnyaka yonalo sinjani,” kutsho uMbangeni.
UMkhokheli womanyano weMDC Alliance uMnu Nelson Chamisa uhambe emthethwandaba ekhonona ngokuthi uMongameli Mnangagwa onqobileyo kukhetho lukamongameli waqilibezela.
UMnangagwa uyakuphika lokhu njalo uthi wanqoba kungela kuthandabuza njalo wethesa uChamisa umlandu wokudlalisa isikhathi somthethwandaba.
Inengi selimelele ngamehlo abomvu isinqumo somthethwandaba lo owe Constitutional Court.