Umsekeli kameya wedolobho le Chegutu, uMnu. Edward Dzeka uthi uthunjwe ngabantu abane, omunye wabo obegqoke impahla zesisotsheni obehlome ngombhoho, ngesikhathi evele eKadoma esiya eChegutu ngemota yakhe.
Kubikwa uDzeka edonswe amaphambili ngamadoda la amthathe ayamhlukuluza okwamahola amabili andubana bamtshiye emgwaqweni ephakathi kobuhlungu.
UDzeka wayelilunga leZanu PF kodwa waxotshwa ngemva kokugenqulwa kombuso kaMongameli Mugabe.
Uthi amadoda amthumbileyo amkhuze ukuthi angasekeli uMnu. Nelson Chamisa owe MDC-T ngoba ekumanyano we MDC Alliance.
Ngeviki edluleyo umsekeli kaMongameli, uMnu. Constantino Chiwenga utshele umhlangano owenzelwe eHarare ukuthi uDzeka uzazibonela kodwa engacacanga ukuthi uzabonani.
UDzeka ubikwa emangale lesi sehlakalo emapholiseni kodwa imizamo yokukhulumisana lamapholisa yehlule.
Kambe kungaba seluqala na udlakela lwezombusazwe phambilini kokhetho?
Lo ngumbuzo esiwubuze ingcwethi ecubungula ezombusazwe, uMnu. Ngqabutho Nicholas Mabhena.
“Lokhu yinto esingayithandiyo njalo esingafuni ukuthi yenzakale ngoba thina esikukholelwayo yikuthi umuntu kumele azingenele kubandla afuna ukuba kilo njalo futhi nxa efuna ukukhankasa enze ngendlela afuna ngakhona,” kutsho uMabhena.
