Abantu baseZansi yeMaNdebeleni bathi usuphuzile umthetho wokuvikela abathengi ngoba udingakala ngokuphangisa ikakhulu ngales’isikhathi umumo womnotho welizwe umi mazonzo.
Lokhu kuphume emhlanganweni lamalunga ekhomithi yedale ephalamende ebona ngezokuthengiselana eyeIndustry and Commerce ngoLwesibili eGwanda ngesikhathi ezodinga umbono kazulu ngalokhu okumele kumunyathwe yiConsumer Protection Bill.
Inengi labathengi lithi lithwele amagabha avuzayo kulezinsuku ngoba abezitolo befaka yiloba yiphi intengo abayicabangayo.
UMnu. Misheck Ndlovu, ongusomabhizimusi kulelilodolobho, uthi kumele kube lomthetho ozabamba ngamandla abezitolo ukuthi bayamukele yiloba yiphi imali esetshenziswa elizweni.
“Ma ngifika eshop yakho ngiphethe ifoni yami ngiyathenga ngithi mina sengikufakela iEcocash ulamaprices uthi nxa ngithenga ngeEcocash sekumele ngifake $2 kumbe $3 phezulu ngibona uyabe uyaphambanisa. Nxa ngiphethe i-US dola yami vuma ngithenga ngayo nxa kuyi RTGS dola whatever it is vuma ngithenge ngayo.”
Amazwi akhe agcizelelwe nguMnu. Rido Mpofu, owebandla leZanu PF, othi kumele kucace ukuthi iRTGS dola lilamandla anganani lapho kuqathaniswa ledola leMelika ukuze abathengi bengaqilibezelwa.
“Akuhle kube lerationalisation, iBill le ivikele abathengayo ukuthi i-US dola kufanele ihambe ngalindlendla ukuze into zihambe kuhle, iRand lihambe ngalindlela ukuze zinto zihambe kuhle, idola yethu leyi ilingana lalakho kumbe ayilingani lalokhu kuhle kube sobala entweni zethu zonke”.
UMnu. Alifheli Mudau, odabuka eBeitbridge, uthi kumele impahla ezithengwa kwamanye amazwe ziqale zihlolwe yingcitshi zeZimbabwe ukuze kwenqatshelwe imikhuhlane.
Osakhulayo uMthulisi Siziba osuka eMatobo uthi kuzakubanzima ukuthi kubunjwe umthetho wokuvikela abathengi ngesikhathi ilizwe liphethe lithenga impahla kwamanye amazwe.
Uthi kumele kuvuselelwe amafekithali kuqala ukuze uhulumende enelise ukufaka intengo kulezompahla.
Iqula ledale lephalamende belikhokhelwa nguMnu. Sonny Key Mguni, omelet iBubi edale lephalamende, othi eleZimbabwe selisalele emuva ngoba omakhelwane abafana labo South Africa leZambia sebelayo imithetho evikela abathengi.
Kusenjalo, ukusilela kwamafutha ezimota sekuqalile njalo edolobheni leGwanda osekudale ukuthi abatshayeli bezimota belale emagalajini belinde lawomafutha.
UMongameli Emmerson Mnangagwa ukhweze intengo yamafutha la ngoZibandlela kulandela ukusilela kwawo esithi ukukhuphuka kwentengo kuzadala ukuthi atholakale lula.
