Inhlanganiso ezizimeleyo sezisungule umkhankaso eziwubiza ngokuthi yiNational Constitutional Movement ojonge ukulwisana lokuguqulwa kwesisekelo sombuso ukwenzela ukuthi uMongameli Emmerson Mnangagwa abuse kungedlula ihlandla lakhe lesibili ngo2028, okusekelwa ngamanye amalunga ebandla leZANU PF.
Inhlanganiso lezi zithi akumelanga uMnangagwa abuse kungedlula isikhathi sakhe ngomnyaka ka2028.
Umholi wenhlanganiso yeProject Vote 263 yona ekhokhela umkhankaso-lo, uMnu. Youngerson Matete, uthi kuqakathekile ukuthi uzulu aphatheke kulumkhankaso ngoba ukwephulwa kwesisekelo kuphazamisa umuntu wonke.
Uthe ezinye inhlanganiso ezikumanyano lo zigoqela eyeZINASU, ARTUZ leChitungwiza Residents’ Trust. UMatete uchasisa ngenjongo yomkhankaso lowu athi bafuna ukuwuqinisa kakhulu lonyaka ukuze amalunga eZANU PF engalingi avume ukuba kusekelwe lokhu.
“Sesisungule imovement leyi ukumiswa uMnangagwa ukuba angaphazamisi isisekelo. Sifuna ukuba isisekelo sethu sihlonitshwe. I National Constitutional movement izakhuluma labatsha lozulu wonke ezigabeni zonke kwele Zimbabwe ukuze isisekelo singavunyelwa. Isisekelo kumele sihlonitshwe,”kutsho uMatete.
Uqhubeke esithi kumele abantu bethonisise uhulumende ukuthi ahloniphe isisekelo sombuso ukwenzela ukuthi wonke umuntu athole imsebenzi lentuthuko hatshi ukuba umuntu oyedwa eqhubeke ebusa.
Omunye wabatsha olilunga ledale lephalamende uMnu. Discent Bajila, ophatheka ekusungulweni kwenhlanganiso le, uthi kumele umuntu wonke aphatheke ekumiseni umkhankaso lowu.
“Kuyadingakala ukuthi abantukazana batsho ukuba bafisa ukuba ilizwe lihambe njani. Uhlelo lolu olokumisa ukuba kungabi lomuntu obusa okwamahlandla angapheliyo. Kumele ababusi bethu babe ngabaphathi hatshi ukufela esikhundleni.” kutsho uBajila.
UMnu Herbert Chamuka umkhokheli webandla eliphikisayo elePeople’s Unity Party uthi lokhu kwamukeleke kakhulu.
“Kulungile okwenziwa ngabatsha lokhu. UMnangagwa kakumelanga aqhubeke esembusweni. Abantu bayahawula, imali yakhe ayisebenzi, Siyabakhuthaza laba ukuba kabakusole lokhu batshengisele,”kugcizelela uChamuka.
Igqwetha elilwela amalungelo oluntu uNkosikazi Jacqualine Sande uthi kumele abenhlanganiso ezizimelyo beqhubeke besala ukuba uMnangagwa aqhubeke ekhankasela ukubusa ihlandla lakhe lesibili seledlule.
“Kumele uzulu wonke amise ukuqheliswa kwesikhathi sokubusa kuka Mnangagwa. Lapho abamsekelayo besithi kumele abuse kuze kube ninini kumele uzulu athi hatshi.”
Imizamo yokuthola imbono yeziphathamandla zikahulumande lezebandla leZANU PF kudaba lolu yehlule abanengi besithi basesekukhefu lomnyaka omutsha.
Kodwa osakhulayo okubandla leZANU PF, uMnu Mlungisi Mathonsi, uthi uMnangagwa usesebenze kakhulu ngakho-ke kumele eqhubekele phambili esembusweni.
“Usesebenze kakhulu ubaba. Abatsha laba balahleke kakhulu. Thina sithi kumele abuse nxa sikhangela imsebenzi aseyenzile njalo zizabavimba ukuba bammise.”
Kulamanye amalunga ebandla leZANU PF athi uMnangagwa kumele abuse kungedlula umnyaka ka2028 loba yena esithi usefuna ukuphumula.
Bakhuluma udaba lolu emhlanganweni weAnnual National People’s Conference lapho okwethulwa isinqumo sokuthi kumele aqhubeke esembusweni. Banengi abakuphikisayo lokhu abathi sokumele ayegcina abazukulu ngoba akuvumi ukuba kuguqulwe isisekelo sombuso welizwe ukuze ahlale embusweni.
Sona isisekelo sombuso welizwe sikubeka sobala ukuba osesikhundleni sikamongameli okwamanje angeke abuyele esihlalweni. Singaguqulwanga esebuse okweminyaka elitshumi. Kumele kwenziwe i-referendum kungakaguqulwa isisekelo sombuso welizwe.
Forum