Intshantshu yomdlalo wenqindi esigabeni se heavyweight kwele Zimbabwe uThamsanqa Dube usesungule uhlelo lokuqeqetsha abasakhulayo abafuna ukudlala umdlalo we boxing elokitshini le Pumula koBulawayo.
Iqembu le Tigers Boxing Club lisungulwe nyakenye ngu Thamsanqa Dube oyingqungquthela yomdlalo wenqindi kusigaba se heavyweight kwele Zimbabwe kusukela ngomnyaka ka 2003 njalo oke wabayintshantshu ye Pan African World Boxing Association eminyakeni edluleyo.
Iqembu leli lilabadlali abayithoba minwe mbili abaqeqetshwa nguye uDube othi yena isifiso sakhe ngesokuba athole indawo lapho azasebenzela khona ukuqhuba umsebenzi wokuqeqetsha ingqungquthela zakusasa.
UDube uthi isifiso sakhe ngesokuba ngabe uyathola usekelo lwemali ukuze eyenelise ukuthenga impahla yokusebenzisa egoqela imvunulo zokuzivikela ngoba ukungabi lemvunulo efaneleyo yikho okwenza ukuba engenelisi ukwemukela abesintwana abafuna ukudlala umdlalo wenqindi.
Intathelizindaba yezemidlalo uDorcas Moyo uthi uDube uphakamise idolobho lako Bulawayo ngemisebenzi yakhe yikho umasipala kumele amphathise ngokumupha indawo yokusebenzela.
UDube uqhubekele phambili wathi ukuqeqetsha akwenza abasakhulayo kumphathisa ukuba ahlale esesimeni esihle elungele ukudlala umdlalo wenqindi njengoba engakwazi ukuba engalithola nini ithuba lokulwa lomunye umdlali.
Ensukwini ezedluleyo kube khona umdlali osakhulayo uTrevor Mpofu yena othe ufuna ukuhluthuna isicoco sika Dube yena owacina ukulwa ngo 2011 lapho esehlulwa khona ngo Flo Simba wase South Africa.
UDube uthe akukacaci kumbe lumdlalo uzaphumelela kodwa nxa uzakuba khona uzamthola ewulindele.
UDube uthi isifiso sakhe ngesokuba aqeqetshe abadlali abazakuba zintshantshu hatshi elizweni le Zimbabwe kuphela kodwa lakuzwekazi lase Africa kanye lasemhlabeni jikelele.
Uqhubekele phambili wathi banengi abasakhulayo abamthinta befuna ukuba abaqeqetshe kodwa umgoqo omkhulu yikuba usadinga usekelo lokuba athole impahla yokusebenzisa kanye lendawo yokusebenzela.