Ngenxa yokuqakatheka kokuthi kube lenhlelo ezingenza ukuthi abantu bakhulumisane ngobuhle bokuvota labantu abazabavotela, inhlanganiso yabonozindaba iMedia Institute of Southern Africa-Zimbabwe isisungule indlela zokukhulumisana ebulenjini ezanceda ukuthi abantu baxoxisane ngezokhetho.
Ubulembu lobu buthiwa yi-Vote Watch 263 lwasebenza kakhulu ngokhetho luka 2013 lwaze lwahlonitshwa zinqunquthela zobulembu, iGoogle, njalo ukuvuselelwa kwabo kuzakwenza ukuthi kube lenhlelo ezinengi zokukhulumisa mayelana ngezokhetho.
Ngesikhathi abantu abanengi bekhala ngodubo lwezindaba zamanga ukuvulwa kwe Vote Watch kuza ngenjabulo enkulu kulabo abasebenzisa ubulembu be internet ukubala izindaba.
Ekhuluma ngaloluhlelo omela iMISA Zimbabwe kundaba zebulembu be internet uNkosikazi Kholiwe Majama uthe.
Lokhu kusekelwe ngumgcinisihlalo we MISA Zimbabwe uMnu Tabani Moyo yena othe lokhu bakwenzela ukuthi bathole imbono yokhetho etshiyeneyi kungela kwethuselana ngomnyaka wokhetho.
Umsakazi njalo eyintathelizindaba eleminyaka eminengi isenza lumsebenzi, uMnu John Masuku uthi iVote Watch iqakathekele ukuthi abasemaphandleni sebenelisa ukukhuluma udaba lwabo mayelana lokhetho ngendlela ezilula.
Uphinde wacela iMISA ukuthi izame ukupha abasemakhaya omakhalenkukhwini ukuze benelise ukubala okuyabe kusenzakala kukhasi leli.
Eyinye intathelizindaba elodumo, uMnu. Njabulo Ncube uthi okwenzwe yiMISA sokwenelisa ukuthi uzulu athole indaba zasemaphandleni zona ezandise ukuswelakala kumaphephandaba amakhulu.
IVote Watch263 ikhangelelwe ukunceda intathelizindaba ngokuzazisa okwenzakala emaphandleni okuzabanceda ekubhaleni indaba zabo zokhetho.
Umgcinisihlalo we MISA, uMoyo ungezelele wathi lokhu bakwenza ngemva kokunanzelela ukuthi amaphephandaba amakhulu awananzi indaba zemaphandleni.
