Ezinye induna zeMatabeleland, izakhamizi, lenhlanganiso ezizimeleyo ziqhube umkhosi wokukhumbula abantu ababhubha ngesikhathi seGukurahundi eBhalagwe eMatabeleland South ngoLwesibili, lanxa amapholisa eqale enqaba ukuthi umbuthano lo uqhubeke.
Ekhuluma kulumkhosi, induna uMnu. Fuyana ubikwa esole amapholisa ngokuqala enqabele lumbuthano, wakhuthaza ukuthi abalobi belondoloze okwenzakalayo ngesikhathi seGukurahundi.
Induna uMnu. Mathema usole abanye bakhe ngokwesaba ukukhuluma ngodaba lweGukurahundi nxa belomongameli Emmerson Mnangagwa, ukwenzela ukuthi kube lesisombululo kuloludaba.
Omunye njalo obekulo umkhosi nguNkosazana Khethi Maphosa weBhalagwe, owabhujelwa nguyise uMnu. Mlaga Maphosa abamthatha abesuku njalo kaphendukanga, loNkosazana Sinikiwe Ncube othi abakwazi ukuthi amathambo kayise uMnu. Samson Ncube angaphi.
UMnu. Welshman Ncube, utshele lumbuthano ukuthi kufanele uhulumende avume njalo axolise ngesehlakalo seGukurahundi ukwenzela ukuthi abantu bexole.
UMnu. Mbuso Fuzwayo, isiphathamandla senhlanganiso ye Ibhetshu Likazulu, eyiyo eqoqe lumhlangano uthi umbuthano lo uphumelele lanxa kuqale kwaba lengxaki njalo abantu sebephatheka ngobunengi.
Asenelisanga ukuxoxa lamapholisa ngaloludaba, kodwa ahlezi esithi avimba ukumemetheka kwegcikwane leCOVID ngokwenqabela imbuthano elabantu abanengi. Uhulumende uthi udaba lweGukurahundi luyalungiswa njalo inhlanganiso yakhe ye National Peace and Reconciliation Committee iyakhokhela kulo.
