Abenhlanganiso ezilwela amalungelo abesifazane eZimbabwe bakhala ngokuthi kulutshwana okungathakazelelwa nguzulu, ekugqitshweni komkhankaso wokuqeda udubo lodlakela elizweni owe 16 Days of Activism Against Gender Based Violence, lanxa ilizwe lile mithetho emihle.
Lumkhankaso walonyaka wenziwe ngaphansi kwesihloko esithi "From Peace In The Home To Peace In The World, Make Education Safe For All"
Kodwa inkokheli zenhlanganiso ezilwela amalungelo oluntu ezingene umhlangano wokubonisana ngokuqhutshwa komsebenzi wokusifeza lesi sihloko, owenzelwe emahofisini omanyano we Women Coalition in Zimbabwe, zithi kulutshwana okufezwe lonyaka ngezizatho ezimbalwa.
Unkosikazi Sakhile Sifelani Ngoma owe nhlanganiso ye Women in Politics Support Unit – WIPSU, uthi kusobala ukuba uhulumende lokhe edonsa inyawo ukugcwalisa iziqondiso ezikhuthaza ukulinganiswa kwamathuba.
Isiqokoqela unkosikazi Ngoma,ethi kumqoka ukutholiswa kwabesifazane amathuba okukhokhela kwezombusazwe lohulumende, kuqale phansi emabandleni kuze kuyefika kuhulumende ngokwakhe.
Ukube lokhe edonsa inyawo uhulumende ukulungisisa imithetho ukuze ihambelane lesisekelo sombuso ngokunye okubuyisela muva imizamo yonke esiyenziwe ukulinganisa amathuba, owesifazane eqhubeka encindezelwa ikakhulu osemaphandleni.
Kunanzwe njalo usuku lokukhankasela ukulondolozwa kwelungelo loluntu emhlabeni jikelele, olwe World Human Rights Day lona olunanzwa lamuhla, phansi kwesihloko salonyaka esithi "OUR RIGHTS OUR FREEDOMS ALWAYS", emhlanganweni munye owenzelwe emahofisini eWCOZ , emzini we Avondale West eHarare.